Atyraýda bir aıda aıyppulyn tólemeı júrgen 1 myń júrgizýshi ustaldy

 Atyraýda quqyq buzýshylyq áreketi úshin aıyppul tólemeı 1 092 júrgizýshi ustaldy. Onyń ishinde 900-ge jýyq júrgizýshi aıyppulyn ustalǵan kezde jedel tólegen, dep habarlaıdy QazAqparat tilshisi.

Atyraý qalalyq polıtsııa basqarmasy patrýldik polıtsııa batalonynyń komandıri, polıtsııa maıory Dáýren Násıpollanyń aıtýynsha, qyrkúıekte «Qorǵaý — qaýipti júrgizýshi», «Sergek» aqparattyq júıesiniń kómegimen 490 ákimshilik quqyq buzý deregi tirkelgen.

«Qyrkúıek aıynda aıyppulyn tólemegen 1 092 avtokóliktiń júrgizýshisi anyqtaldy. Onyń ishinde 131 kólik aıyppul óndirilgenge deıin arnaýly turaqqa qoıyldy. Al, 900-ge jýyq kólik júrgizýshisi aıyppulyn ustalǵan jerde jedel tóledi», -dep habarlady Dáýren Násıpolla.

Onyń aıtýyna qaraǵanda ustalǵan kólik júrgizýshisiniń birinde tólenbegen 20 aıyppul bolǵan.

«Jedel basqarý ortalyǵynyń beınebaqylaý qyzmetkerleri keshki saǵat 18:30 shamasynda Interceptor izdeý júıesi arqyly Hyundai avtokóligin anyqtady. Bul kólik Grýzııa Respýblıkasynda tirkelgen. Polıtsııa qyzmetkerleri tekserý kezinde kólik júrgizýshisiniń 330 myń teńgeden asatyn 20 aıyppuly bar ekeni anyqtaldy. Kólik júrgizýshisine qatysty Ákimshilik quqyq buzý kodeksiniń 785-babyna sáıkes hattama toltyryldy. Al, avtokólik arnaıy aıyp turaǵyna qoıyldy», -dep málim etti Dáýren Násıpolla.

Eske sala ketelik, buǵan deıin Atyraý turǵyndary 270 mln teńgeniń salyǵyn áli tólemeı júrgenin habarlaǵan bolatynbyz.