Atyraýda bonýs úshin nesıe alǵan azamattar aldanyp qalǵan
ATYRAÝ. KAZINFORM — Atyraýda bonýs alamyz dep nesıe rásimdegen azamattardyń qaryzy ótelmeı qalǵan. Olarǵa nesıe somasynyń 10–15 paıyzyn berip, qalǵan aqshany bir aı ishinde jaýyp berýge ýáde etilgen. Alaıda ýáde oryndalmaı, azamattar kredıtin ózderi óteýge májbúr bolǵan.
Bul jaǵdaı týraly belsendi Sandýǵash Kýkenova áleýmettik jelisinde jarııalady.
Ótinishte kórsetilgen shema boıynsha, adam aldymen óz atyna nesıe nemese bólip tóleý rásimdegen. Odan keıin aqsha jeke kásipkerdiń nemese kompanııanyń esepshotyna aýdarylyp, qujat júzinde taýar satyp alýǵa ne jóndeý jumysyna tólengendeı kórsetilgen. Azamatqa aqshanyń bir bóligi bonýs retinde berilip, qalǵan nesıeniń qalǵan somasyn bir aıdan keıin ótep berý ýáde etilgen. Alaıda nesıeler jabylmaı qalǵan.
Aldanyp qalǵandardyń boljamynsha, bul júıege 500–800 adam tartylǵan bolýy múmkin. Qazir zardap shekkenderdiń naqty sany men jalpy shyǵyn kólemi belgisiz.
Ujymdyq ótinish avtorlary qarajat kásipkerlerdiń esepshottary arqyly qalaı qozǵalǵanyn, aqshanyń túpkilikti alýshylary kim bolǵanyn jáne deldaldardyń árqaısysy qandaı ról atqarǵanyn tekserýdi suraıdy. Sonymen qatar keıbir deldaldar jábirlenýshilerdi polıtsııaǵa aryz bermeýge nemese burynǵy aryzdaryn qaıtaryp alýǵa úgittegeni týraly málimetterdi de tekserýdi talap etedi.
Atyraý oblystyq PD bul jaǵdaıǵa qatysty qylmystyq is qozǵalǵanyn málimdedi.
— Atalǵan derek boıynsha alaıaqtyq babymen qylmystyq is qozǵaldy. Qazirgi ýaqytta sotqa deıingi tergep-tekserý amaldary júrgizilýde. Ózge aqparat tergeý múddesine sáıkes jarııalaýǵa jatpaıdy, — delingen habarlamada.
Buǵan deıin Astanada marketpleıs júrgizý boıynsha oqytý qyzmetin usynyp, alaıaqtyq jasaǵan áıel sottalǵanyn jazdyq.
