Atyraýda blogerlerge kúsh qoldanǵan jigitke 461 myń teńge aıyppul salyndy

ATYRAÝ. KAZINFORM — Atyraýda saýda ortalyǵyndaǵy býtıkke kirip, tikeleı efırge shyqqan bolgerlerge kúsh qoldanǵan jigitke 461 myń teńge aıyppul salyndy.

Atyraý qalasyndaǵy № 2 sotta QR Qylmystyq kodeksiniń 109-1-babynyń 2-bóliginiń 1-tarmaǵymen qylmystyq is qaraldy. Aıyptalýshyǵa eki nemese odan da kóp adamǵa qatysty tán aýrýyna ushyratqan, biraq densaýlyqqa jeńil zııan keltirýge alyp kelmegen zorlyq-zombylyq áreketterin jasaǵanyna baılanysty aıyp taǵylǵan.

Іs materıalynda blogerlerdiń Atyraý qalasynda ornalasqan saýda ortalyǵyndaǵy býtıkke kirip, tikeleı efırge shyqqany, sanıtarııalyq normalardy saqtalmaǵany úshin polıtsııa qyzmetkerlerin shaqyrǵany kórsetilgen.

«Býtık ıesiniń uly blogerlerdiń satýshylarǵa jumys jasaýǵa kedergi keltirgenine ashýlanyp, olardy saýda ortalyǵynan kúsh qoldaný arqyly shyǵarýǵa tyrysqan. Olardyń densaýlyqtaryna zııan keltirmesten, tán aýrýyna ushyratqan», — dep habarlady atalǵan sottan. 

Prokýror sottalýshyny 40 táýlikke qamaqqa alyp, jábirlenýshilerdiń azamattyq talap aryzdaryn tolyq qanaǵattandyrýdy usyndy. Al, sottalýshy kinásin moıyndamaı, ózin aqtaýdy suraǵan. Jábirlenýshiler sottalýshyǵa qatań jaza taǵaıyndalǵanyn qalady.

«Sottalýshynyń kinási jábirlenýshilerdiń, kýálardyń aıǵaqtarymen, iske tirkelgen beınejazbalarmen dáleldendi. Sottalýshy taǵylǵan aıypqa sáıkes kináli dep tanyldy. Oǵan 125 aılyq eseptik kórsetkish mólsherinde 461 myń 500 teńge aıyppul salý jazasy taǵaıyndaldy. QR Qylmystyq kodeksiniń 98-3-babymen sottalýshynyń júris-turysyna 3 aı merzimge erekshe talaptar belgilendi. Jábirlenýshilerdiń azamattyq talap aryzdary ishinara qanaǵattandyryldy. Sottalýshydan jábirlenýshilerdiń árqaısysynyń paıdasyna 200 myń teńgeden moraldyq zalal ótemaqysy óndirildi», — dep málim etti sottan.

Sot úkimi zańdy kúshine engen joq.

Eske sala ketelik, budan buryn Atyraýda ІІ top múgedegi tis emhanasynyń sapasyz qyzmeti úshin sotqa júgingenin habarlaǵan edik.