Atyraýda bilim salasynyń qyzmetkeri mektepterge 5000 kitap syıǵa tartpaq
ATYRAÝ. KAZINFORM — Bilim salasynyń qyzmetkeri Amandyq Esqalı jas urpaqtyń sanasyn jańǵyrtýǵa jáne olardyń sapaly bilim alýyna baǵyttalǵan birqatar irgeli jobany júzege asyryp keledi. Onyń bastamasymen óńirdegi 200 mektepke 5000 kitap taratý qolǵa alyndy.
2019 jyly Inderbordan Mahambet mazaryna deıin 50 shaqyrymdyq attyly ekspedıtsııa uıymdastyrylyp, oǵan oqýshylar qatysty. Bul bastama keıin aýqymdy jobaǵa ulasty.
2023 jyly 190 mekteptiń oqýshylary arasynda «Mahambettiń taǵdyry» atty kitap oqý baıqaýy jáne Mahambet Ótemisulynyń 200 jyldyǵyna oraı 450 oqýshy qatysqan quiz oıyny ótti.
Osy eńbektiń nátıjesinde oqýshylarǵa arnalǵan «Isataı men Mahambetti bilesiń be?» kitaby jaryq kórdi. Onda Isataı Taımanuly men Mahambet Ótemisulynyń ómiri týraly keńinen jazylǵan.
Aıta keteıik, bilim salasynyń qyzmetkeri júzege asyryp otyrǵan bul jobalar oqýshylardyń kitap oqýǵa degen qyzyǵýshylyǵyn arttyryp, oqý mádenıetin qalyptastyrýǵa jáne ulttyq qundylyqtardy dáripteýge yqpal etpek.
