Atyraýda bilim berý salasynyń úzdikteri marapattaldy
ATYRAÝ. KAZINFORM - Atyraý oblysynda ustazdar kúnine oraı «Qaldyrǵan izi máńgilik» taqyrybynda saltanatty is-shara ótti.
Merekelik jıynǵa oblys ákimi Serik Shápkenov qatysyp, óńirdegi úzdik pedagogtardy marapattady.
Oblys ákimi quttyqtaý sózinde Memleket basshysy Qasym-Jomart Toqaevtyń ustaz mártebesin arttyrý jónindegi bastamalaryna erekshe toqtaldy.
– El Prezıdenti únemi bilim berý salasyna basa mán berip keledi. Ustaz – ulttyń rýhanı temirqazyǵy, bolashaqqa jol bastaıtyn tulǵa. Biz qaı salada eńbek etsek te, sonyń bastaýynda ustaz turady. Árqaısymyzdyń jetistigimiz ben qoǵamdaǵy aıshyqty ornymyzdyń artynda ustazdyń eńbegi jatyr. Sondyqtan bilim salasyna jan-jaqty qoldaý kórsetý – memleketimizdiń strategııalyq mindetteriniń biri. Búginde jas urpaqqa sapaly bilim, sanaly tárbıe berip otyrǵan ustazdar qaýymynyń eńbegi ólsheýsiz. Barshańyzǵa tolaǵaı tabys, talmas qanat, shákirt tárbıeleýde shabyt tileımin, – dedi oblys ákimi.
Saltanatty jıynda birqatar pedagog QR Oqý-aǵartý mınıstrliginiń «Ybyraı Altynsarın» tósbelgisimen, sondaı-aq «Bilim berý isiniń Qurmetti qyzmetkeri» tósbelgisimen marapattaldy.
Jalpy mereke aıasynda 92 pedagog QR Oqý-aǵartý mınıstrliginiń marapatymen, 36 ustaz Atyraý oblysy ákiminiń Alǵys hatymen, sondaı-aq 400-den astam muǵalim oblystyq bilim berý basqarmasynyń Alǵys hatymen marapattaldy.
