Atyraýda byltyrǵy sý tasqyny jyrǵan joldy jóndeý qashan bitedi

ATYRAÝ. KAZINFORM — Byltyr kóktemgi sý tasqyny Atyraý oblysyndaǵy Dososr-Qulsary aralyǵyna qatynaıtyn joldy jyryp ketken edi. Bul joldyń qazirgi ahýaly qandaı?

«QazAvtoJol» UK» AQ Atyraý oblystyq fılılalynyń dırektory Serik Kerimqulovtyń aıtýynsha, tasqyn sý jyrǵan tus respýblıkalyq mańyzy bar «Dossor-Qulsary» baǵytyndaǵy jolda ornalasqan. 

— Ótken jyly atalǵan joldyń ózge bóliginde de negizgi qabat ylǵaldyń áserinen buzylǵany anyqtalǵan edi. Soǵan baılanysty jolǵa ortasha jóndeý jumysyn júrgizý úshin konkýrs ótkizilip, merdigerler anyqtaldy. Qazir atalǵan jolda jóndeý jumystary júrgizilip jatyr, — deıdi Serik Kerimqulov. 

Atalǵan jolda jóndeý jumystaryn eki merdiger atqaryp jatyr. Onyń biri — «Birlik Jol Stroı» JShS. Merdigermen byltyrǵy 13 maýsymda kelisimshart jasalǵan.

Soǵan sáıkes «Dossor — Kulsary — Beıneý — Saı-Ótes — Shetpe — Jetybaı –Aqtaý» avtomobıl jolynyń eki bóligine — 3-36, 36-69 shaqyrym aralyǵynda ortasha jóndeý júrgizý tapsyrylǵan. 

Máselen, joldyń 3-36 shaqyrym aralyǵynda 1 320 sharshy metr shuńqyr jamalady. Al 54 320 sharshy metrdiń jol jabyny qyrylyp alynady.

Sondaı-aq, 14 800 qýma metrdi quraıtyn jaryqqa shaıyr quıý josparlanǵan. Joldyń 7 200 sharshy metr jıegine qıyrshyq tas tóselip, nyǵaıtý jumysy júrgiziledi. 

Al 36-69 shaqyrym aralyǵynda 1 600 sharshy metr shuńqyr jamalady. Jol bul bóliginde 76 431 sharshy metrdiń jabyny alynyp, 10 152 qýma metrge shaıyr quıylady. Asfaltbeton jabyny 6 600 sharshy metrge tóseý, 4 500 sharshy jol jıegi qıyrshyq taspen nyǵaıtylady. 

Al ekinshi merdiger — «SıneMıdasStroı» JShS-men aradaǵy kelisimshartqa byltyrǵy 16 qyrkúıekte qol qoıylǵan. Bul merdigerge júktelip otyrǵan mindettiń mańyzy zor. Óıtkeni, atalǵan kompanııa joldyń úsh bóligine jóndeý júrgizýdi mindetine alǵan.

Onyń ishinde byltyrǵy kóktemde tasqyn sý jyrǵan 101-102-shaqyrym aralyǵy bar. Sonymen birge tasqyn sý basqan 119-122-shaqyrym aralyǵyna ortasha jóndeý júrgiziledi.

— Qazir jóndeý jumysy jalǵasyp jatyr. Jumystyń sapaly atqarylýyn udaıy baqylaımyz. Al tasqyn sý jyrǵan bólikte buryn sý ótkizetin turba bolmaǵan. Qazir eki temirbeton turba qoıylyp, endi ústine asfalt tóseý jumysy qolǵa alyndy. Bul jumys shildeniń ortasyna deıin aıaqtalady, — deıdi Serik Kerimqulov. 

Alaıda, «Jol aktıvteri sapasynyń ulttyq ortalyǵy» RMK Atyraý fılıalynyń dırektory Aslan Dúısenovtiń aıtýyna qaraǵanda, ortasha jóndeý jumystarynan aqaý anyqtalyp otyr. 

— Bizdiń fılıaldyń mamandary «Dossor — Qulsary» baǵytyndaǵy joldyń ortasha jóndeý júrgizilip jatqan bóligine tekserý júrgizip keledi. Joldy tegisteý arqyly qalpyna keltirý kezinde negiz qabaty ylǵaldyń áserinen buzylyp, birneshe aqaýdyń paıda bolǵanyn anyqtady. Merdigerlerge byltyr jáne bıyl jóndeý júrgizilip ýchaskelerdegi birneshe aqaýdy joıý jóninde usynystar berildi. Qazir merdigerler ortasha jóndeý jobasynda qarastyrylmaǵan negizgi qabattaǵy aqaýlardy óz qarjysynyń esebinen joıýdy qolǵa aldy. Aqaýdy joıý jumystarynyń nátıjesi fılıal mamandarynyń qatań baqylaýynda bolady, — deıdi Aslan Dúısenov.

Eske sala ketelik, buǵan deıin Qulsaryda sý tasqyny saldarynan búlingen kópir qaıta jańǵyrtylǵanyn habarlaǵan bolatynbyz. 

Ótken aptada Atyraý oblysynda byltyrǵy sý tasqynynan búlingen jolda kópir paıdalanýǵa berildi.