Atyraýda byltyrǵy qazannan beri turǵyn úıdegi órtten 6 qaza tapqan

ATYRAÝ. KAZINFORM — Atyraý oblysynda byltyrǵy qazannan beri turǵyn úı sektorynda 50 órt oqıǵasy tirkelgen. 

Órttiń saldarynan 6 adam qaıtys bolǵan. Onyń ishinde eki bala bar.

Atyraý oblystyq TJD memlekettik órt baqylaý basqarmasy bastyǵynyń orynbasary, azamattyq qorǵaý maıory Daýren Berdenovtiń málimetinshe, órttiń 50 paıyzdan astamy elektr jelisiniń tuıyqtalýynan bolǵan.

«Jylytý maýsymy bastalǵan qazan aıynan beri turǵyn úı sektorynda 50 órt oqıǵasy tirkelip otyr. Onyń ishinde 18 órt qańtar aıynan beri bolǵan. Turǵyn úıdegi jalynnyń saldarynan 6 adam qaza tapty. Onyń ishinde 2 adam órtten, 2 eresek pen 2 bala gaz jarylysynan kúıik jaraqatyn alyp, oblystyq aýrýhananyń jan saqtaý bóliminde qaıtys boldy», - deıdi Dáýren Berdenov.

Onyń aıtýynsha, jylytý maýsymy qarsańynda 974 márte reıd ótkizilgen. Reıd kezinde 94 576 adamǵa órt qaýipsizdigi erejesin saqtaý túsindirilgen.

«Turǵyn úıdegi órttiń birneshe sebebi bar. Órttiń 50 paıyzdan astamy tok jelisiniń qysqasha tuıyqtalýynan bolady. Al, 5-7 paıyzy balalardyń otpen oınaýynan bolatyny anyqtalyp otyr», - dep málim etti Dáýren Berdenov. 

Osy kezge 1 702 turǵyn úı ıesiniń áleýmettik turmysy tómen ekeni anyqtalǵan. Jergilikti atqarýshy organdar qoldaýymen atalǵan turǵyndardyń úıine ýly gaz ben tútinge baılanysty dybys belgisin beretin 1163 datchık qondyrylǵan.

Eske sala ketelik, buǵan deıin Atyraýda turǵyn úıde gaz jarylyp, 5 adamdy kúıik shalǵanyn jazǵan edik.

Atyraý qalasynyń Kókarna aýylynda 2 qańtarda turǵyn úıde gaz-aýa qospasynyń dúmpýi bolǵan. Dúmpýdiń sońy órtke ulasyp, turǵyn úıdiń 140 sharshy metri janyp ketken. Órttiń saldarynan 5 adamdy kúıik shaldy. Zardap shekkender aýrýhanaǵa tústi.

Keıin aýrýhananyń jansaqtaý bóliminde erli-zaıypty, úsh aılyq jáne úsh jasar bala qaıtys boldy.