Atyraýda bıyl birde-bir jańa aıaldama salynbady
ATYRAÝ.KAZINFORM – Bıyl Atyraýda jańa avtobýs aıaldamalary salynǵan joq. Al qalaǵa 200-ge jýyq aıaldama qajet. Ákimdik osy jyly 100-in salýdy josparlaǵan edi. Alaıda bul jumys jospar kúıinde qaldy.
Jol qurylysy nemese jóndeý aıaqtalǵan kóshelerdiń keıbiri áli kúnge aıaldamalarmen tolyq qamtylmaǵan. Sáýir aıynda ákimdik ókilderi bıyl 100 aıaldama ornatylatynyn málimdegen edi.
Alaıda bul jumys istelmedi. Aıaldamalar Bereke, Órken, Juldyz, Mıras, Samal syndy birneshe yqshamaýdanǵa qajet.
- 2027 jyly qala aýmaǵynda bastapqy kezeńde 50 aıaldama pavılonyn ornatý úshin tıisti bıýdjet qarajatyn suratý josparlanyp otyr. Sonymen qatar, aıaldama pavılondaryn ornatý jumystary tek atalǵan 50 nysanmen shektelmeıdi. Bul – bastapqy kezeńge josparlanyp otyrǵan san. Qala aýmaǵyndaǵy aıaldamalardy kezeń-kezeńimen jańartý jáne qosymsha pavılondar ornatý jumystary aldaǵy jyldary da jalǵasyn tabatyn bolady,-dep jaýap berdi qalalyq jolaýshylar kóligi jáne avtomobıl joldary bólimi.
Qalalyq turǵyn úı-kommýnaldyq sharýashylyq bólimi 2025 jylǵa deıin qala aýmaǵynda jáne qalaǵa qarasty eldi mekenderde salynǵan aıaldamalar men aıaldama pavılondaryn jolaýshylar kóligi jáne avtomobıl joldary bóliminiń teńgerimine berý boıynsha qajetti qujattardy ázirlep jatyr. Qujattar tolyq rásimdelgen soń nysandar atalǵan mekemeniń teńgerimine beriledi. Keıin olardy kútip-ustaý jáne jóndeý jumysyna jolaýshylar kóligi jáne avtomobıl joldary bólimi jaýapty bolady.
Búginde Atyraý qalasynda qoǵamdyq kólikter 39 baǵyt boıynsha jolaýshy tasymaldaıdy. Atalǵan baǵyttarǵa kúndelikti 310 avtobýs qyzmet kórsetedi. Onyń ishinde 36 baǵyt jergilikti bıýdjet qarajaty esebinen sýbsıdııalanady. Bul úshin qazynadan 15,5 mlrd teńge bólý josparlanǵan.
- Jyl qorytyndysy boıynsha tasymaldaýshylardyń naqty oryndaǵan jumysy men rastalǵan shyǵyndaryna sáıkes tólenetin sýbsıdııa kólemi josparlanǵan somadan tómen bolýy múmkin. Qoǵamdyq jolaýshylar tasymalyn sýbsıdııalaý «Áleýmettik mańyzy bar jolaýshylar tasymaldaryn júzege asyrýmen baılanysty tasymaldaýshylardyń shyǵyndaryn bıýdjet qarajaty esebinen sýbsıdııalaý qaǵıdalaryna» sáıkes júzege asyrylady. Atalǵan qaǵıdalarǵa sáıkes, sýbsıdııalaý jergilikti atqarýshy organ belgilegen tarıf pen jolaýshylar tasymalynyń ekonomıkalyq negizdelgen tarıfi arasyndaǵy aıyrmashylyqtan týyndaıtyn tasymaldaýshylardyń shyǵyndaryn óteý maqsatynda júrgiziledi,-dep túsindirdi bólim.
Qazirgi ýaqytta Atyraý qalasynda jolaýshylardy elektrondyq bıletteý júıesi boıynsha eki operator – «Smart Qala» jáne «ONAY» kompanııalary jumys istep jatyr. Zańnama talaptaryna sáıkes, qoǵamdyq kólikte elektrondyq bıletteý qyzmetin birneshe operator qatarynan kórsete alady. Osyǵan baılanysty qalalyq ákimdik naqty bir operatordy tańdap, aldaǵy ýaqytta tek bir ǵana tólem júıesimen jumys isteý týraly sheshim qabyldanǵan joq.
Kazinform tilshisi 2012 jyldan beri ózgermegen jolaqy tarıfine qatysty suraq qoıdy. Ákimditiń resmı jaýabyna súıensek, kún tártibinde qoǵamdyq kóliktegi jol aqysyn kóterý máselesi joq.
- Qazirgi ýaqytta jolaqy tarıfin kóterý máselesi josparǵa engizilmegen. Aldaǵy ýaqytta bul másele týyndaǵan jaǵdaıda, tıisti ekonomıkalyq esepteýler men negizdemelerge sáıkes qaralady,-dep jaýap berdi qalalyq jolaýshylar kóligi jáne avtomobıl joldary bólimi.
Buǵan deıin Qostanaı avtobýstarynda qolma-qol tólem toqtatylýy múmkin ekenin jazǵan edik.