Atyraýda bıyl 592 neke buzylǵan
ATYRAÝ. KAZINFORM — Jyl basynan beri Atyraý oblystyq kámeletke tolmaǵandardyń isteri jónindegi mamandandyrylǵan aýdanaralyq sotyna nekeni buzý týraly 1 400-den astam talap aryz túsken. Bul byltyrǵy osy kezeńmen salystyrǵanda 3 paıyz kóp.
Jyl basynan beri 1 214 is qaralyp, 592 erli-zaıyptynyń nekesi buzylǵan. Qazir taǵy 361 is sot óndirisinde jatyr.
Sot málimetinshe, ajyrasýǵa ótinish bildirýshiler kóbine minezderiniń jaraspaýyn, otbasyndaǵy janjaldardy, alkogolge táýeldilik pen qumar oıyn sııaqty sebepterdi alǵa tartady.
Atyraý oblystyq kámeletke tolmaǵandardyń isteri jónindegi mamandandyrylǵan aýdanaralyq sotynyń sýdıasy Ásel Amantaıdyń aıtýynsha, sotta eń aldymen taraptardy tatýlastyrýǵa basymdyq beriledi.
— Sot otyrysynyń basynda taraptar medıatordyń kómegimen ózara kelisimge kelip, tatýlasyp jatady. Mundaı jaǵdaıda talap qoıýshy talabyn qaraýsyz qaldyrý týraly ótinish beredi. Soǵan sáıkes protsessýaldyq sheshim qabyldanyp, is qaraýsyz qaldyrylady. Bıyl 76 talap aryz qaıtaryldy, al 432 is qaraýsyz qaldyryldy, — dedi sýdıa.
Byltyr 415 is boıynsha erli-zaıypty ózara kelisimge kelip, otbasyn saqtap qalǵan. Al byltyr osy kezeńde 511 juptyń nekesi zańdy túrde buzylǵan.
Eske salaıyq, Qazaqstanda jas jubaılarǵa nekege deıin keńes berý ortalyqtary jumys isteıdi.
