Atyraýda bes jyl buryn órtengen qonaq úı áli qalpyna keltirilmeı tur

Atyraý qalasynda bes jyl buryn «Aqjaıyq» qonaq úıi órtengen edi. Sodan beri qonaq úıdiń sáýlettik kelbeti áli qalpyna keltirilgen joq, dep habarlaıdy Kazinform.

Atyraý qalasynyń ortalyq kóshesinde, Jaıyq ózenine jaqyn ornalasqan qonaq úı 2018 jyly órtengen.

Sodan beri ǵımarattyń sáýlettik kelbeti qalpyna keltirilmegen.

Qonaq úıdiń búgingi jaı-kúıi Atyraý qalalyq ákimdiginde arnaıy talqylandy.

Qala ákimi Shákir Keıkınniń pikirinshe, «Aqjaıyq» qonaq úıiniń sáýlettik kelbetin jóndep, zaman talabyna saı qalpyna iske qosylmaı tur.

«Máslıhat depýtattary men qoǵam belsendileriniń, jurtshylyqtyń kókeıindegi basty máseleniń biri — „Aqjaıyq“ qonaq úıiniń búgingi kelbeti men jaǵdaıy. Qonaq úı ǵımaratynyń syrtqy jáne ishki kelbeti 2018 jyly órtengennen beri syn kótermeı tur. Órttiń oryn bolǵanyna 5 jyldan asty. Alaıda, áli kúnge ózgeris joq. Qys mezgilinde ishki jumystaryn júrgizip, jazda syrtqy kelbetin qalypqa keltiretindeı ýaqyt boldy. Qonaq úıdiń sáýlettik kelbetin qalpyna keltirip, iske qosatyn ýaqyt jetti», -deıdi Shákir Keıkın.

Ákimniń aıtýynsha, nysannyń baǵyty — qonaq úı bıznesi. Alaıda, ǵımarattyń aldyna atqarýshy organnyń ruqsatynsyz jeńil konstrýktsııaly dúńgirshekter ornatylǵan.

«Kásip ıeleri kúıi ketip turǵan qonaq úıdiń aldyna qosymsha zańsyz dúńgirshekter ornatyp, qala kelbetine nuqsan keltirmeýi kerek. Kásipkerler de bárine ortaq zań talabyn saqtaýǵa tıis», -dep málim etti Shákir Keıkın.

«Tehne hotel» JShS basshysy Sanjar Tilepovtiń aıtýynsha, «Aqjaıyq» qonaq úıiniń syrtqy kelbetin 2024 jylǵy naýryz aıynda qalpyna keltirý josparlanǵan.

Al, ishki árleý jumysy josparǵa saı júrgiziledi.

Eske sala ketelik, budan buryn Atyraý ákimi eskertkish mańynda kógershinderge nan qaldyǵyn shashpaýdy usynǵanyn jazǵan edik.