Atyraýda belgisiz sebepten iri qara ólip jatyr
ATYRAÝ. KAZINFORM — Atyraý qalasyna qarasty Keńózek aýyldyq okrýginde sońǵy aılarda 20-dan astam iri qara qyrylǵan. Sharýalar maldyń neden ólgenin anyqtaýdy surap otyr. Al veterınar mamandardyń alǵashqy zerthanalyq tekserýinen qaýipti aýrýlar anyqtalmaǵan.
Sharýalardyń aıtýynsha, mal shyǵyny sońǵy aılarda kóbeıgen. Qalybek Jıenbaevtyń qojalyǵynda bıyl 19 iri qara ólgen. Sharýa jalpy shyǵynyn 8 mln teńge dep baǵalap otyr.
— Eń bastysy — maldyń neden aýyryp jatqanyn anyqtaý. Óristen kelip nemese qorada jatqan jerinde ólip jatyr. Jalǵyz meniń qojalyǵym emes, basqa sharýalar da osyndaı máselege tap bolyp jatyr, — dedi Qalybek Jıenbaev.
Keńózek aýyldyq okrýginiń ákimi Edýard Ospanovtyń aıtýynsha, iri qaradan aýrý belgileri de, qaýipti indetke tán jaǵdaı da anyqtalmaǵan ólgen maldardyń ólekseleri sanıtarlyq talaptarǵa saı joıylyp, mal turǵan oryndar zalalsyzdandyrylǵan. Veterınar mamandar iri qaradan qan jáne patologııalyq materıaldar alyp, oblystyq veterınarııalyq zerthanaǵa jibergen. Sonymen qatar sý men shópten de synama alynǵan.
Atyraý qalalyq veterınarııalyq stansasynyń basshysy Yqylas Azamatovtyń aıtýynsha, zerthanalyq tekserýlerden aýrýlarǵa qatysty teris nátıje alynǵan.
— Qan synamalaryn, patologııalyq materıaldardy alyp, oblystyq veterınarııalyq zerthanaǵa jiberdik. Nátıjesinde aýrýlarǵa qatysty teris nátıje kórsetti. Qosymsha sý men shópten synamalar alyndy. Olardan da taza degen nátıje shyqty, — dedi veterınarııalyq stansa basshysy.
Sharýalar jaýapty organdardan mal óliminiń sebebin anyqtap berýdi surap otyr. Qyrylǵan túlikke dıagnoz qoıylmaǵandyqtan aýyrǵan malǵa qandaı em qoldaný keregin de bilmeıdi. Búginde sharýalar mal óliminiń sebebin anyqtaý úshin qosymsha zertteý júrgizýdi surap otyr.
Al patologııalyq synamalardy Astana nemese Almaty qalalaryndaǵy veterınarııalyq ortalyqtarǵa jiberý máselesi ázirge qaralmaǵan.
Buǵan deıin Túrkistan oblysynda 19 myń basqa arnalǵan mal bırjasy salynyp jatqanyn jazǵan edik.
