Atyraýda basseınge batqan 10 jasar qyzdyń ólimine kináli qutqarýshy shartty túrde sottaldy

ATYRAÝ. KAZINFORM – Atyraýda «Munaıshy» stadıonyndaǵy basseınge 10 jasar qyz batyp ketken edi. Sot úkimimen jasóspirimdi eresekter júzetin zalǵa jibergen qutqarýshyǵa shartty jaza berildi.

Bul oqıǵa 14 shildede bolǵan. Osy oqıǵaǵa baılanysty qutqarýshyǵa qatysty qylmystyq is qozǵaldy. Bul is Atyraý qalasynda №2 sotta qaraldy.

Sot materıalyndaǵy derekke qaraǵanda, «Munaıshy» sport keshenindegi JShS-niń qutqarýshysy ózine júktelgen qaýipsizdik mindetterin saqtamaǵan. Ol 10 jasar qyzdy basseındegi eresekterge arnalǵan júzý zalyna ótkizgen.

«Onda jasóspirim basseınniń tereńdigi 5,5 metr bolatyn qaýipti bóliginde júzýge barǵan. Júze almaǵandyqtan qyz bala basseınge batyp ketken. Qutqarýshy tarapynan buǵan der kezinde nazar aýdarylmaǵan. Shuǵyl túrde kómek kórsetý boıynsha qaýipsizdik talaptary saqtalmaı, abaısyzda jasóspirimniń ólimine ákep soqqan», -dep habarlady sottyń baspasóz qyzmeti.

Prokýror men sottalýshy arasynda kináni moıyndaý týraly protsestik kelisim jasaqtaldy. Jábirlenýshi tarap kelisim sharttarymen kelisti.

«Úkim qylmystyq jaýaptylyq pen jazany jeńildetetin barlyq mán-jaılar eskerile otyryp, kelisimdik is júrgizý tártibinde shyǵaryldy. Sottalýshy QR Qylmystyq kodeksiniń 306-babynyń 3-bóligimen kináli dep tanylyp, oǵan 4 jyl merzimge bas bostandyǵynan aıyrý jazasy taǵaıyndaldy. Atalǵan qujattyń 63-babyn qoldanylyp, sottalýshyǵa jaza shartty túrde berildi», - málim etti sottan.

Sot úkimi zańdy kúshine engen joq.

Eske sala ketelik, buǵan deıin Atyraýdaǵy 4 jasar balanyń ólimine baılanysty balabaqsha dırektory men tárbıeshiniń bas bostandyǵy shektelgenin jazǵan edik.