Atyraýda bard Tabyldy Dosymovtyń eski «Volgasy» restavratsııadan ótkiziledi

ATYRAÝ. KAZINFORM — Atyraýlyq bard Tabyldy Dosymovtyń kózi tirisinde paıdalanǵan «Volga» kóligi úıiniń aýlasynda tur. Endi eski kólikti restavratsııadan ótkizý josparlanǵan.

Tabyldy Dosymov — Inder aýdanynyń týmasy. Ol ál-Farabı atyndaǵy QazMÝ-diń jýrnalıstıka fakýltetin bitirgenimen, qazaqtyń talantty aqyndary Muqaǵalı Maqataev, Farıza Ońǵarsynova, Esenǵalı Raýshanov, Svetqalı Nurjanovtyń óleńderine birneshe án jazǵan. Sózin de, ánin de ózi jazyp, gıtaramen oryndaǵan tól shyǵarmalary kóp.

Qazir tanymal kompozıtordyń «Unatamyn men seni», «Bıiktik», «Sáıgúlik» ánderi jıi oryndalady.  «Atyńdy seniń aıtamyn án qylyp nege?», «Qozym-aý» deshi kúlimdep Baıandaı maǵan, Tirlikti mynaý, janym-aı, máńgilik deme, Uıyqtap ketsem bir kúni, oıanbaı qalam…» dep jyrlaǵan Tabyldy Dosymov 45 jasynda ómirden ótti. 

Atyraý oblysy ákiminiń orynbasary Daryn Shamuratovtyń aıtýynsha, aqyn ári kompozıtordyń shyǵarmashylyǵyn dáripteý, jas urpaqqa keńinen nasıhattaý kózdelip otyr. 

— Bıyl qazaqtyń tuńǵysh bard-aqyny Tabyldy Dosymovtyń týǵanyna 60 jyl tolady. Osyǵan oraı oblys ákimi Serik Shápkenovtiń tapsyrmasymen aqyn mingen «Volga» avtokóligi restavratsııadan ótetin bolady. Bul ıgi isti oblys ákiminiń orynbasary Qaırat Nurtaevpen birge júzege asyramyz, - deıdi Daryn Shamuratov.

Eske sala ketelik, budan buryn Atyraýda Alǵys aıtý kúninde ózge etnostyń balasy «Erke sylqym» kúıin tartyp bergenin jazǵan edik.