Atyraýda bankrot bolǵysy kelgen 2 792 adamnyń ótinishi qaraýsyz qaldy
ATYRAÝ. KAZINFORM – Atyraý oblysynda jyl basynan beri 3 488 adamdan bankrot dep tanýǵa ótinish túsken.
Atyraý oblystyq memlekettik kirister departamenti dármensiz boryshkerlermen jumys basqarmasynyń bas mamany Shuǵa Janshaevanyń deregine súıensek, osy kezge deıin 149 ótinish maquldanǵan. Al, 104 ótinish áli qaralyp jatyr.
«Jeke tulǵalardy bankrot dep tanýdyń ózindik talaby bar. Aldymen «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» Zańnyń talabyna sáıkes ótinish bergenderdiń qarjylyq jaǵdaıyna monıtorıng júrgiziledi. Bıyl jyl basynan beri ótinishi muqııat tekserilgen 375 adam bankrot dep tanyldy. Endi olarǵa aldaǵy 5-7 jylda bankterden jáne mıkroqarjy uıymdarynan nesıe alýǵa tyıym salynady. Bankrot bolyp tanylǵandardyń qarjylyq jaǵdaıyna aldaǵy 3 jyl boıy monıtorıng júrgiziledi», - deıdi Shuǵa Janshaeva.
Onyń málimetinshe, 2 792 adamnyń ótinishi qaraýsyz qaldyrylǵan. Onyń birneshe sebebi bar.
«Óıtkeni, bul boryshkerlerdiń jubaılarynyń atyna birneshe múliktiń tirkelgeni anyqtalyp bolyp otyr. Máselen, biriniń atynda avtokólik, ózge múlik, baǵaly qaǵazdar men bankterde ashylǵan depozıt bar. Keıbiriniń jubaıymen birge ortaq múlki bary anyqtaldy. Mine, osyndaı sebepterden soń 2 792 adamnyń ótinishin qaraýsyz qaldyrýǵa sheshim qabyldandy. Endi olar bankrottyqty qoldana almaıdy», - dep málim etti Shuǵa Janshaeva.
Eske sala ketelik, buǵan deıin Atyraý oblysynda 350 adam sottan tys bankrot dep tanylǵanyn jazǵan edik.
