Atyraýda baltamen qatarlastaryn qýǵan oqýshy oqıtyn mekteptiń dırektory qyzmetinen bosatyldy

ATYRAÝ. KAZINFORM – Atyraý oblysy Qulsary qalasyndaǵy №6 mekteptiń dırektory óz aryzy negizinde qyzmetinen bosatyldy. Bul aqparatty oblystyq bilim berý basqarmasynyń baspasóz qyzmeti rastady.

5 aqpan kúni 10 synyp oqýshysy qatarlastarymen bolǵan janjaldan keıin olardy mektep ishinde baltamen qýalaǵan. Saldarynan 2 bala jeńil dene jaraqatyn alǵan. 

Atalǵan derek boıynsha buzaqylyq faktisimen qylmystyq is qozǵaldy. 

Osy jaǵdaıdan keıin Atyraý oblysy ákiminiń tapsyrmasyna sáıkes onyń orynbasary Daryn Shamuratov, Bilim berý basqarmasynyń basshysy Marat Ábýov bastaǵan top Atyraýdaǵy bilim ordalaryna aralap, qaýipsizdigin tekserýdi bastap ketti. Bul jumys barysynda mektepterdegi qaýipsizdikke jaýapty kúzet fırmalarynyń sapasy men jumysy tekserilmek. 

QR oqý-aǵartý mınıstri Juldyz Súleımenova bolsa mektepte bolyp jatqan balalar arasyndaǵy quqyq buzýshylyq, tóbeles,álimjettik syndy keleńsiz jaǵdaılarǵa basqarýshylyq turǵydan da, quqyqtyq turǵydan da baǵa berilýi tıis ekenin málimdedi. 

– Býllıng máselesi boıynsha qoldanystaǵy zańnamada ákimshilik jaýapkershilik qarastyrylǵan. Osyǵan baılanysty Atyraý oblysyna arnaıy oqý-aǵarý mınıstriliginen komıssııa barady. Óńirdegi birqatar mektep tekseriledi. Nátıjesinde arnaıy zerdeleý jumystary júrgiziledi. Qorytyndy shyǵarylyp, máseleni sheshý joldary talqylanady, - dep pikir bildirdi mınıstr Juldyz Súleımenova. 

Osyǵan deıin Atyraýda oqýshylardyń esirtkige táýeldiligi tekseriletinin jazǵan edik.