Atyraýda balasynyń sýıtsıd jasaýǵa oqtalýyna sebepker áke 6 jylǵa sottaldy

ATYRAÝ. KAZINFORM — Atyraýda er adam balasynyń sýıtsıd jasaýǵa oqtalýyna sebepker bolǵan. Sot kinálini 6 jylǵa bas bostandyǵynan aıyrdy.

Atyraý qalasyndaǵy № 2 sottyń málimetine súıensek, sottalýshyǵa QR Qylmystyq kodeksiniń 105-babynyń 3-bóligimen aıyp taǵylǵan. Bul — kámeletke tolmaǵandy ózin-ózi óltirýge oqtalýyna deıin jetkizý.

— 2023 jyldyń qarasha aıynda sottalýshy óziniń kámeletke tolmaǵan balasyna qatygezdik kórsetip, ony ózin-ózi óltirýge oqtalýǵa deıin jetkizgen. Kórsetilgen mán-jaılar men sottalýshynyń kinási kámeletke tolmaǵan jábirlenýshi men onyń zańdy ókiliniń, kámeletke tolmaǵan kýá men is boıynsha kýálardyń aıǵaqtarymen, tergeý áreketteriniń hattamalarymen, keshendi sot-psıhologııalyq-psıhıatrııalyq, qosymsha keshendi sot-psıhologııalyq-psıhıatrııalyq saraptama qorytyndylarymen, zattaı dáleldemelermen dálelin tapty, — dep habarlady qalalyq sottan.

Alaıda sottalýshy ózine taǵylǵan aıyppen kelispeı, aqtaýdy surady. Sottalýshynyń jazasy men qylmystyq jaýaptylyǵyn jeńildetetin, ne aýyrlatatyn mán-jaılar anyqtalmady.

— Sottalýshy taǵylǵan aıyp boıynsha kináli dep tanyldy. Oǵan QR Qylmystyq kodesiniń 58-babynyń 6-bóligine sáıkes túpkilikti 6 jyl merzimge bas bostandyǵynan aıyrý jazasy taǵaıyndaldy, — dep málim etti sottan.

Sot úkimi zańdy kúshine engen joq.

Eske sala keteıik, budan buryn Atyraýda 15 jasar qyzǵa zábir kórsetken kúıeýi 2,5 jylǵa sottalǵanyn habarlaǵan edik.