Atyraýda balalaryn satqan áıel 8 jylǵa sottaldy
ATYRAÝ. KAZINFORM – Atyraý soty balalaryn satqan áıeldi 8 jylǵa bas bostandyǵynan aıyrýǵa úkim shyǵardy. Onyń 4 sybaılasy 3 shartty túrde 3 jylǵa sottaldy.
Atyraý oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń 5 sottalýshyǵa qatysty úkimi apellıatsııalyq tártipte qaraldy.
«S.A. júkti bola tura materıaldyq jaǵdaıyn jaqsartý maqsatynda óziniń balasyn dúnıege kelgen soń satatyn bolyp, otbasylyq jup R.B. jáne R.G.-men sóz baılasqan. Aqshany bergennen keıin otbasylyq jup balany ózderine alǵan. S.A. qaıtadan júkti bolǵan. Sol kezde bótenniń múlkin aldaý jáne senimdi teris paıdalaný jolymen jymqyrý úshin basqa eki otbasylyq jupqa balany belgili bir sommaǵa satýǵa ýáde bergen. Alaıda, olardyń aqshasyn alyp, izin sýytqan. Nátıjesinde jábirlenýshilerge 2,3 mln. teńge zalal keltirilgen», - dep habarlady sottyń baspasóz qyzmeti.
Osy kezde sottalýshy S.A. óziniń balasyn dúnıege kelgen soń satatyn bolyp, basqa otbasylyq jup I.B. jáne Ý.A.-men sóz baılasqan. Otbasylyq jup bala dúnıege kelgenshe sottalýshy S.A.-nyń shotyna aqsha aýdaryp otyrǵan. Bala dúnıege kelgen soń I.B. jáne Ý.A. ony óz otbasyna alǵan. Otbasylyq juptar R.B., R.G. jáne I.B., Ý.A. jańa týǵan balalardy aqshaǵa satyp alyp, ákelikti anyqtap, balalardyń týý týraly kýálikterine óz atyn jazdyrǵan.
«Sot úkimimen S.A. adamdar tobynyń aldyn ala sóz baılasýymen, birneshe ret dármensiz kúıdegi kámeletke tolmaǵandar saýdasymen aınalysqany, sondaı-aq, birneshe ret alaıaqtyq jasaǵany úshin 8 jyl merzimge bas bostandyǵynan aıyrý jazasyna sottalǵan. Al, R.B., R.G., I.B. jáne Ý.A.-ǵa adamdar tobynyń aldyn ala sóz baılasýymen, dármensiz kúıdegi kámeletke tolmaǵandar saýdasymen aınalysqany úshin QR Qylmystyq kodeksiniń 55-babynyń 4-bóligin qoldanýmen shartty túrde 3 jyl merzimge bas bostandyǵynan aıyrý jazasyna taǵaıyndalǵan», - dep habarlady sottyń baspasóz qyzmeti.
Sottalýshylar men advokattar oblystyq sottyń qylmystyq ister jónindegi sot alqasyna apellıatsııalyq shaǵym túsirdi. Shaǵymdanýshylar sot úkiminiń kúshin joıyp, aqtaý úkimin shyǵarýdy surady.
«Alqa apellıatsııalyq shaǵymdardy zerdeleı kele, sot úkimin ózgertýge nemese onyń kúshin joıýǵa negizder tappady. Osyǵan baılanysty qylmystyq ister jónindegi sot alqasynyń qaýlysymen birinshi saty sotynyń úkimi ózgerissiz, apellıatsııalyq shaǵymdar qanaǵattandyrýsyz qaldyryldy», - dep málim etti sottyń baspasóz qyzmetinen.
