Atyraýda balalarǵa kohlearlyq ımplantattaý operatsııasy jasalmaq
ASTANA. KAZINFORM – Atyraý oblystyq balalar aýrýhanasynda Batys Qazaqstanda alǵash ret kohlearlyq ımplantattaý boıynsha halyqaralyq master-klass ótip jatyr, dep habarlaıdy Densaýlyq saqtaý mınıstrligi.
Estý qabileti aýyr buzylǵan balalar aldaǵy ýaqytta joǵary tehnologııalyq medıtsınalyq kómekti turǵylyqty jerine jaqyn jerde alý múmkindigine ıe bolady.
Kohlearlyq ımplantattaý estý qabileti aıqyn tómendegen nemese tolyq sańyraý balalarǵa kádimgi estý apparattary qajetti nátıje bermegen jaǵdaıda jasalady. Bul tehnologııa balalardyń dybysty qabyldaýyna, sóıleý qabiletin damytýyna jáne kúndelikti ómirge beıimdelýine múmkindik beredi.
Buǵan deıin mundaı operatsııalar negizinen Astana, Almaty jáne Túrkistan qalalaryndaǵy iri medıtsınalyq ortalyqtarda ǵana júrgizilip kelgen.
– Oqytý aıaqtalyp, mamandar tolyq daıyndyqtan ótkennen keıin kohlearlyq ımplantattaýdy Atyraý oblysynda bıylǵy jyldyń sońyna qaraı júrgizý josparlanyp otyr. Bul buryn basqa qalalardaǵy medıtsınalyq ortalyqtarǵa júginýge májbúr bolǵan óńir turǵyndary úshin mamandandyrylǵan kómektiń qoljetimdiligin arttyrady, – delingen mınıstrlik málimetinde.
Halyqaralyq master-klass aıasynda jetekshi mamandar óńir dárigerlerimen birlesip oqytý jumystaryn júrgizip, dıagnostıka men hırýrgııalyq emdeýdiń zamanaýı tásilderin talqylap jatyr. Sondaı-aq kórsetilimdik operatsııalar jasalýda.
Bul óńirdiń otorınolarıngologtary men hırýrgterine oblystyq balalar aýrýhanasynyń bazasynda tájirıbelik daǵdylardy meńgerip, zamanaýı tehnologııalardy ıgerýge múmkindik beredi.
Qazirgi ýaqytta Atyraý oblysynda estý qabileti buzylǵan balalar mamandardyń baqylaýynda. Olardyń bir bóligi buǵan deıin elimizdiń ózge óńirlerinde kohlearlyq ımplantattaýdan ótken. Jańa baǵyttyń iske qosylýy óńirde joǵary tehnologııalyq medıtsınalyq kómek kórsetý múmkindikterin edáýir keńeıtedi.
Uıymdastyrýshylardyń aıtýynsha, halyqaralyq master-klass óńirdegi joǵary tehnologııalyq medıtsınalyq kómekti damytýdaǵy mańyzdy kezeń bolmaq. Alynǵan bilim men tájirıbelik daǵdylar mundaı operatsııalardy óz betinshe oryndaı alatyn mamandar tobyn qalyptastyrýǵa múmkindik beredi.
Sarapshylar men óńir dárigerleriniń birlesken jumysy emdeýdiń zamanaýı ádisterin engizýge, jergilikti mamandardyń biliktiligin arttyrýǵa jáne Atyraý oblysynda kohlearlyq ımplantattaýdy turaqty negizde júrgizýge jaǵdaı jasaıdy.
Aıta keteıik, Jambyl oblysynda sarkoma dıagnozymen 183 naýqas esepte tur.
