Atyraýda balalardyń túnde oıyn-saýyq oryndarynda bolýyna jol bergen 69 kásipker jazalandy
ATYRAÝ. KAZINFORM - «Aıqyn nátıje» jáne «Sanaly urpaq» jobalaryn júzege asyrý aıasynda qala aýmaǵynda qoǵamdyq tártipti saqtaýǵa jáne quqyq buzýshylyqtardyń oryn alý qaýpin azaıtýǵa baǵyttalǵan baqylaý-profılaktıkalyq sharalar júıeli túrde júrgizilip jatyr.
Atyraý qalalyq prokýratýrasy baspasóz qyzmetiniń habarlaýynsha, tekserý nátıjeleri boıynsha azamattar úshin ashyq qaýip tóndirgen 12 qaraýsyz qalǵan nysanǵa kirý shekteldi. Osyǵan uqsas basqa da ǵımarattarǵa qatysty ýákiletti organdarǵa olardy dereý konservatsııalaý, buzý nemese rekonstrýktsııalaý týraly nusqamalar berildi.
Kámeletke tolmaǵandardyń quqyqtaryn qorǵaýǵa erekshe kóńil bólindi, túnde balalardyń kóńil kóterý oryndarynda bolýyna jol bergeni úshin 69 kásipkerlik sýbektisi ákimshilik jaýapqa tartylyp, 3 túngi klýbtyń qyzmeti toqtatyldy.
Balalardy tárbıeleý jáne olardyń qaýipsizdigin qamtamasyz etý boıynsha mindetterdi tıisinshe oryndamaǵany úshin 3 612 zańdy ókil jaýapqa tartyldy.
-Qalalyq máselelerge jedel áreket etý jáne qadaǵalaý qyzmetiniń tıimdiligin arttyrý maqsatynda «Tsıfrlyq karta» jobasy aıasynda jasandy ıntellekt tehnologııalary tartyldy. Qylmystyń aldyn alýǵa baǵyttalǵan keshendi tásil qalalyq okrýgtegi quqyq buzýshylyqtardyń jalpy deńgeıin 12%-ǵa tómendetýge múmkindik berdi,-delingen habarlamada.
Zańdylyq pen qoǵamdyq qaýipsizdikti nyǵaıtý boıynsha júıeli jumys jalǵasyp jatyr.
Osyǵan deıin Aqtaýda kásipkerdiń balalarǵa tegin balmuzdaq taratqany úshin aıyppul arqalaǵany týraly jazdyq.
