Atyraýda balalardy erte jastan eńbekke jáne kásipke baýlý jobasy iske qosyldy
ATYRAÝ.KAZINFORM – Atyraý oblysynda Respýblıkalyq «Erte jastan eńbekke jáne kásipke baýlý» jobasyna qańtar aıynan bastap 5 mektepke deıingi uıym qatysyp keledi. Onyń ishinde 3 memlekettik jáne 2 jekemenshik bóbekjaı-baqsha bar, – dep habarlaıdy Óńirlik kommýnıkatsııalar qyzmeti.
Jobaǵa 4–5 jas aralyǵyndaǵy 581 bala qatysyp, 43 pedagog tartylǵan. Sonymen qatar BabySkills – álemdik deńgeıde qoldanylatyn JuniorSkills pen WorldSkills baǵdarlamalarynyń jalǵasy. Onyń ereksheligi – balalardy mamandyqtarmen tanystyrý balabaqsha kezeńinen bastalady.
Osynyń arqasynda balalar ártúrli mamandyqtarmen tanysyp, eńbek pen kásip daǵdylaryn oıyn jáne tájirıbe arqyly meńgeredi. Bul olardyń erte jastan qyzyǵýshylyǵyn oıatyp, shyǵarmashylyq qabiletterin damytýǵa múmkindik beredi.
– Atyraý oblysynan Atyraý qalasyndaǵy №29 «Nursaıa», №39 «Aq kógershin» bóbekjaı-baqshalary, jekemenshik «Mıras» jáne «Altyn saqa» bóbekjaı-baqshalary, sondaı-aq Mahambet aýdanyndaǵy «Altyn-Aı» bóbekjaı-baqshasy qatysyp otyr. Joba aıasynda balabaqshalarda balalarǵa arnalǵan zergerlik, aspazdyq, tiginshilik, ınjenerlik zerthana, qurylys alańy, jylyjaı men baý-baqsha, sondaı-aq qolóner baǵytyndaǵy tájirıbelik jumystar uıymdastyrylyp jatyr. Bul balalardyń eńbekke degen qyzyǵýshylyǵyn erte jastan qalyptastyrýǵa múmkindik beredi, – dedi Atyraý oblysy Bilim berý basqarmasynyń bas mamany Gúlsim Gılmanova.
«Erte jastan eńbekke jáne kásipke baýlý» dep atalatyn joba búldirshinderdi eńbeksúıgishtikke tárbıeleýdi jáne olardyń qabiletin jetildirýdi maqsat etedi. Ol jóninde QR Oqý-aǵartý mınıstrligi resmı saýalymyzǵa joldaǵan jaýabynda tolyǵyraq málimet berdi.
