Atyraýda balaǵa kúsh kórsetken tárbıeshige qatysty qylmystyq is qozǵaldy
ATYRAÝ. KAZINFORM – Inder aýdanyndaǵy «Baldáýren» balabaqshasynda tárbıeshiniń búldirshinge kúsh kórsetken sáti beınejazbaǵa túsip qaldy. Atalǵan derek boıynsha qylmystyq is qozǵaldy.
Áleýmettik jelide Inder aýdanyndaǵy «Baldáýren» balabaqshasy tárbıeshisiniń búldirshinge kúsh kórsetken sáti túsirilgen vıdeo tarady. Beınejazbadan toptaǵy balalardyń biri týǵan kúnin atap ótip jatqany baıqalady. Osy kezde tárbıeshi búldirshinderdi ústel basyna jınap, torttaǵy shyraqty úrleýge daıyndaǵan. Balalardy retke keltirý barysynda tárbıeshiniń bir balany julqylap, kúsh kórsetkenin baıqaýǵa bolady.
Atyraý oblystyq bilim berý basqarmasynyń málimetinshe, Inder aýdany prokýratýrasynyń áleýmettik jelilerge júrgizgen monıtorıngi barysynda atalǵan balabaqshanyń «Solnyshko» tobynda tárbıeshiniń kámeletke tolmaǵan tárbıelenýshige kúsh qoldaný faktisi anyqtalǵan.
Bul derek protsestik sheshim qabyldaý úshin Inder aýdanynyń polıtsııa bólimine joldanǵan.
- Atalǵan derek boıynsha qylmystyq is qozǵaldy. Balabaqshadaǵy beınebaqylaý kameralarynyń jazbalary zerdelenýde. Tergeý amaldary júrgizilýde,-dep habarlady oblystyq PD baspasóz qyzmeti.
Oblystyq bilim berý basqarmasy da oqıǵanyń mán-jaıyn anyqtaý boıynsha tıisti jumys istelip jatqanyn, qorytyndysy qosymsha habarlanatynyn málimdedi.
Eske salaıyq, jýyqta Quryltaı depýtaty Táttigúl Talaeva balabaqshalarda úzdiksiz aýdıojazba júrgizýdi usynǵan edi.