Atyraýda balabaqshanyń biri jóndeýge jabyldy, ekinshisi buzylady

ATYRAÝ. KAZINFORM – Atyraý qalasynyń mańyndaǵy Erkinqala aýylynda balabaqsha jóndeýge jabyldy. Buǵan bıyl naýryzda qabyrǵasynyń jarylǵany sebep bolǵan.

Atyraý oblystyq bilim basqarmasynyń baspasóz qyzmetinen málim etkendeı, №37 «Bolashaq» balabaqshasynyń ǵımaraty 2019 jylǵy 17 jeltoqsanda qoldanysqa berilgen. 

– Erkinqala aýyldyq okrýgindegi bóbekjaı-baqshanyń qurylysyn «Tonykók qurylys» JShS júrgizip, paıdalanýǵa tapsyrǵan. Nysan 290 orynǵa eseptelgen. Osyǵan deıin qalypty jaǵdaıda boldy. Bıylǵy jyldyń 31 naýryz kúni bóbekjaı-baqshanyń bir jaq bóligindegi tómengi qabattaǵy qabyrǵalarynda jaryqtar paıda boldy. Edeni tómenge túsken. Keıin jaryq ulǵaıdy, - dep habarlady basqarmanyń baspasóz qyzmeti. 

Osyǵan baılanysty balabaqshanyń nysanyna tehnıkalyq saraptama júrgizilip, 14 mamyrda qorytyndysy shyǵarylǵan. Soǵan sáıkes nysannyń tehnıkalyq jaǵdaıy tolyq qalpyna keltirilgenge deıin balalardyń qaýipsizdigi úshin jumysyn toqtatý kerek degen qorytyndy jasalǵan. 

– Balabaqsha 1 maýsymda jumysyn toqtatty. Atyraý qalalyq bilim bóliminiń sheshimine sáıkes balalar jaqyn mańdaǵy balabaqshalarǵa ornalastyryldy. Qyzmetkerlerdiń 80 paıyzy eńbek demalysyna jiberildi. Ózge qyzmetkerlerge ujymdyq shart boıynsha jalaqynyń 50 paıyzy tólenedi. Qazirgi kezde jóndeý júrgizý úshin jobalyq-smetalyq qujattama daıyndalyp jatyr, - dep málim etti basqarmanyń baspasóz qyzmetinen. 

Al Jylyoı aýdanynyń Shoqpartoǵaı aýylyndaǵy balabaqshany buzýǵa sheshim qabyldanǵan. Bul derekti aýdan ákiminiń orynbasary Gúlnafıs Aıshýaqova rastady. 

Atalǵan balabaqsha 2016 jyly paıdalanýǵa berilgen. Onyń qurylysy «Teńizshevroıl» kompanııasynyń «Igilik» baǵdarlamasymen salynǵan. Syıymdylyǵy 160 oryndyq balabaqshaǵa «Baldáýren» ataýy berilgen.

– Bul balabaqshanyń irgetasy otyryp, jaryq paıda boldy. Merdiger birneshe ret jóndeý júrgizdi. Tehnıkalyq saraptama qorytyndysyna sáıkes balabaqsha nysany 2022 jyly apatty jaǵdaıda dep tanyldy. Soǵan baılanysty atalǵan balabaqsha buzýǵa túpkilikti sheshim qabyldandy, - dedi Gúlnafıs Aıshýaqova. 

Alaıda, apatty balabaqshanyń nysanyn buzý áli bastalmaǵan. Endi Shoqpartoǵaı aýylynda taǵy bir balabaqshanyń qurylysy júrgizilip jatyr. Jańa balabaqsha 280 orynǵa arnalǵan. 

Eske sala ketelik, buǵan deıin Atyraýda qaıtarylǵan qarjy esebinen mektep-ınternattyń qurylysy bastalǵanyn jazǵan edik.