Atyraýda balabaqshadan oryn alý kezeginiń biryńǵaı bazasy iske qosyldy

ATYRAÝ. KAZINFORM — Atyraýda balabaqshaǵa kezekke turý, oryn bólý men esepke alýdyń biryńǵaı bazasy iske qosyldy. Endi ata-analar birden 4 balabaqshany tańdaı alady. 

Atyraý oblystyq bilim basqarmasy basshysynyń orynbasary Oryntaı Bımanovanyń aıtýynsha, balabaqsha jáne bos oryn týraly aqparat biryńǵaı bazasy aıasynda elektrondy úkimettiń portalyndaǵy kartada ornalastyrylady. Ata-anaǵa kartadan óz úıine, ne jumysyna jaqyn ornalasqan balabaqshany tańdaý múmkindigi qarastyrylǵan. 

«Elimizde balabaqshalardan oryndardy bólý kezinde sybaılas jemqorlyq táýekelin joıý maqsatynda joldama berýdiń, kezektilik pen esepke alýdyń biryńǵaı bazasy ázirlendi. Endi balabaqshadan oryn alý aıtarlyqtaı jeńildeıdi. Oryndy bólýdiń ashyqtyǵyn qamtamasyz etý jáne sybaılas jemqorlyq táýekelderin boldyrmaý maqsatynda SMS-habarlamalar joldanady. Jeńildigi bar ekenin rastaý úshin qaǵaz túrindegi anyqtamalar jınaýdyń qajeti joq. Bul málimetter memlekettik derekter bazasynan avtomatty túrde alynady. Balabaqshany tańdaǵannan keıin kezek nómiri beriledi. Bul týraly ata-anaǵa habarlama jiberiledi. Otbasynda eki, ne odan kóp bala bolsa, olardy bir balabaqshaǵa berý múmkindigi bar», - dedi Oryntaı Bımanova.

Onyń aıtýyna qaraǵanda, ótinish berýdiń birneshe tásili usynylǵan. Bul — elektrondy úkimet portaly, ekinshi deńgeıli bankterdiń mobıldi qosymshalary, jergilikti atqarýshy organdardyń platformalary. 

Eske sala ketelik, budan buryn Atyraýdaǵy 4 mekteptiń ashanasynda qujaty joq etten as ázirlengenin habarlaǵan edik.