Atyraýda baǵany negizsiz ósirgen kásipkerlerge 2,8 mln teńge aıyppul salynǵan

ATYRAÝ. KAZINFORM – Atyraý oblysynda kúndelikti tutynatyn azyq-túlik baǵasyn negizsiz ósirgen kásipkerlerge  2 mln 817 myń teńge aıyppul salynǵan.

Atyraý oblysy ákiminiń orynbasary Marat Mýrzıevtiń aıtýynsha, eń ótkir máseleniń biri — kúndelikti tutynatyn azyq-túliktiń baǵasy.

— Byltyr Atyraý oblystyq saýda jáne tutynýshylar quqyǵyn qorǵaý departamenti QR Saýda qyzmetin retteý týraly zań talaptaryn buzǵan 62 kásipkerlik sýbektige jospardan tys tekserý júrgizdi. Tekserý qorytyndysymen 46 kásipkerlik nysanya 16 eskertý berilip, 30 ákimshilik aıyppul salyndy. Aıyppuldyń jalpy somasy 2 mln 817 myń 691 teńgeni qurady, - deıdi Marat Mýrzıev. 

Onyń aıtýyna qaraǵanda, byltyrǵy mamyrda áleýmettik mańyzy bar azyq-túlik taýarlaryna ruqsat etilgen shekti bólshek saýda baǵalarynyń mólsheri bekitilgen. Osyǵan oraı monıtorıngtik top apta saıyn eń qajetti azyq-túlikterdiń baǵasyn qadaǵalaıdy. 

— Óńirdegi saýda nysandarynyń ıelerine baǵany turaqtandyrý jóninde keńes berildi. Soǵan qaramastan, tutynýshylar aryzyna sáıkes Atyraý qalasyndaǵy «Anvar», «Marko», «ıArmarka», «Masha Frýt», Qulsary qalasyndaǵy «Ideal» sýpermarketine shara qoldanyldy. Óıtkeni bul saýda oryndarynda tótenshe jaǵdaı kezinde belgilengen taýarlar shekti baǵadan qymbatqa satylǵan. Endi bıyl áleýmettik mańyzy bar taýarlardyń baǵasyn negizsiz ósirgen kásipkerlerge aıyppul kólemi birinshi zań buzýshylyqtan keıin eskertýsiz salynatyn bolady, - dep habarlady Marat Mýrzıev.

Qazir áleýmettik mańyzy bar azyq-túlikter «Dına», «Kóktem», «Saraıshyq» bazary men «Lıder», «IDEAL», «Paida market» sýpermarketinde, sondaı-aq 6 saýda povılonynda satylady. 

Eske sala ketelik, budan buryn Atyraý oblysynyń turaqtandyrý qorynan 1,4 myń tonna kartop satylǵanyn habarlaǵan bolatynbyz.