Atyraýda azyq-túlik baǵasyn shekten tys kótergen 42 kásipker aıyppul arqalady
ATYRAÝ. KAZINFORM — Atyraýda áleýmettik mańyzy bar azyq-túlik taýarlaryn belgilengen mólsherden joǵary baǵamen satqan 42 kásipker jaýapkershilikke tartyldy. Olarǵa jalpy 692 myń teńge aıyppul salynǵan.
Jyl basynan beri Atyraý oblysy Saýda jáne tutynýshylardyń quqyqtaryn qorǵaý departamenti saýda salasynda 121 memlekettik baqylaý júrgizgen. Nátıjesinde bıýdjetke 1 mln 967 myń teńge óndirildi.
Sonymen qatar taýar baǵasyn teńgemen kórsetpegen 79 kásipker jaýapkershilikke tartylyp, olarǵa 1 mln 275 myń teńge kóleminde aıyppul salyndy.
— Áleýmettik mańyzy bar azyq-túlik taýarlarynyń baǵasyna apta saıyn monıtorıng júrgiziledi. Baqylaý saýda jelilerin, bazarlar men úı mańyndaǵy dúkenderdi qamtıdy. Monıtorıng barysynda baǵanyń ózgerýine áser etetin faktorlar, onyń ishinde maýsymdyq suranys, naryqtaǵy usynys kólemi jáne óndiristik-logıstıkalyq shyǵyndar taldanady, -dedi Atyraý oblystyq saýda jáne tutynýshylardyń quqyqtaryn qorǵaý departamenti basshysy Samat Embergen.
Jalpy toǵyz aıda departamentke 2 635 ótinish túsken. Onyń 961-i bólshek saýdaǵa, 611-i elektrondyq saýdaǵa, 135-i týrızm qyzmetterine qatysty.
Ótinishterdiń 59 paıyzy qanaǵattandyrylǵan. Al 570 ótinish boıynsha azamattarǵa túsindirý jumysy júrgizilip, 308 aryz quzyrly memlekettik organdarǵa joldandy.
Sondaı-aq jyl basynan beri departament 31 tekserý júrgizdi. Onyń 19-y jospardan tys tekserý, 12-si profılaktıkalyq baqylaý. Nátıjesinde 13 kásipkerlik sýbektisine jalpy 1 mln teńge kóleminde aıyppul salyndy.
«Sapaly ónim» jobasy aıasynda qoǵamdyq uıymdar zerthanalyq saraptamaǵa 126 túrli ónim joldaǵan. Zertteý nátıjesinde barlyq ónimnen zańbuzýshylyq anyqtaldy. Onyń 118-inde tańbalaýǵa qatysty, 12-sinde sanıtarııalyq-epıdemıologııalyq talaptar boıynsha kemshilik tirkeldi.
Buǵan deıin súrlengen et satamyn dep 31 adamdy aldaǵan kásipker sottalǵanyn jazǵan edik.
