Atyraýda azamattyq nekedegi áıelin óltirmek bolǵan kúdikti ustaldy

ATYRAÝ. KAZINFORM – Atyraýda azamattyq nekede turǵyn burynǵy áıelin óltirýge oqtalǵan kúdikti Aqtaý qalasynan ustaldy.

Atyraý oblystyq polıtsııa departamenti baspasóz qyzmetiniń málimetinshe, kúdiktiniń Aqtaý qalasyna barǵany anyqtalǵan.

«Polıtsııa qyzmetkerleriniń keshendi jedel-izdestirý is-sharasynyń nátıjesinde 9 maýsym kúni Atyraý qalasyndaǵy kópqabatty úıdiń dálizinde 1991 jylǵy áıeldi óltirýge oqtalǵan kúdikti Aqtaý qalasyna ketip qalǵany anyqtaldy. Kúdikti ustaldy. Onyń jasy – 29-da. Qazir oǵan qatysty qylmystyq is tergelip jatyr. Ózge aqparat tergeý múddesine sáıkes jarııalaýǵa jatpaıdy», - dep málim etti departamenttiń baspasóz qyzmeti.

Eske sala ketelik, buǵan deıin Atyraý polıtsııasy azamattyq nekedegi áıelin óltirýge oqtalǵan er adamdy izdep jatqanyn jazǵan bolatynbyz.

Sondaı-aq, Atyraýda er adamnan zábir kórip, aýrýhanaǵa túsken áıeldiń jaǵdaıy aýyr ekenin habarlaǵan edik.

Atyraý oblystyq densaýlyq saqtaý basqarmasy baspasóz qyzmetiniń aqparatyna qaraǵanda, jábirlenýshi moıyny men ıyǵynan jaraqat alǵan. Qazir naýqas aýrýhananyń neırohırýrgııa bólimshesinde em alyp jatyr. Onyń jaǵdaıy turaqty, biraq, aýyr. Bir jaq qoly men aıaǵynda álsizdik bar.