Atyraýda aıaldamalardyń azdyǵy jolaýshylar men júrgizýshilerge qıyndyq týǵyzyp otyr

Qaladaǵy ózekti máselelerdiń biri – aıaldamadan jaıaý júrginshiler jolyna ótý. Kóp jaǵdaıda jolaýshylar avtobýstan túsken soń qaýipsiz jaıaý júrginshi jolyna jetý úshin kólik júretin jol jıegimen júrýge májbúr. Al keıbiri abattandyrylǵan aýmaqty basyp ótedi.

Aıaldamalar Bereke, Órken, Juldyz, Mıras, Samal syndy yqsham aýdandar men Erkinqala, Almaly aýyldaryna qajet. Avtopark ókilderiniń aıtýynsha, bul másele birneshe jyldan beri kóterilip keledi.

– Mysaly, Samal yqsham aýdanynda №21 baǵyttyń boıynda 11 «jol berińiz» belgisi bar. Sonyń bárine avtobýs toqtaıdy. Biraq kóp jerde aıaldama men qaltasha qarastyrylmaǵan. Qolaısyz aýa raıynda avtobýstardyń jol shetine toqtaýy qıyn. Sonymen qatar aıaldamaǵa jaqyn ornalasqan jaıaý júrginshiler ótkelderi de qaýipti. Jolaýshylar avtobýstan túsken soń birden jolaqqa júgirip ótedi, al basqa kólikter olardy baıqamaı qalýy múmkin, - dedi Algabus JShS bólim basshysy Asyljan Jasqaıratov.

Al qalalyq ákimdik ókilderi máseleni kezeń-kezeńimen sheshý josparlanǵanyn aıtady. Bıyl qalada 100 jańa aıaldama ornatý kózdelip otyr. Qazirgi ýaqytta qajetti qarjy eseptelip, qujattary daıyndalyp jatyr.

– 2026 jyly 100 aıaldama men arnaıy qaltashalaryn salý úshin qarjy eseptelip, bıýdjettik komıssııaǵa usynys berildi. Qazirgi tańda bastapqy qarajat bólindi. Aldaǵy ýaqytta konkýrs jarııalanady. Sonymen qatar aıaldamalardyń naqty oryndary polıtsııa departamentimen birlesip anyqtalyp, barlyq qajetti jol belgisi ornatylady, - dedi Atyraý qalalyq jolaýshylar kóligi jáne avtomobıl joldary bóliminiń bas mamany Qaırat Qoıshyǵalı.

Aıta keteıik, ótken jyly Atyraýda qoǵamdyq kóliktiń qatysýymen 47 jol-kólik oqıǵasy tirkelip, 8 adam qaza tapqan. Al bıyldyń ózinde bir qaıǵyly jaǵdaı bolǵan.

Buǵan deıin Atyraýdaǵy avtobýstarda taǵy bir tólem júıesi iske qosylǵanyn jazǵan edik.