Atyraýda avtogazdy durys bólmedi degen kúdikpen basqarma tergelip jatyr
ATYRAÝ. KAZINFORM – Atyraýda suıytylǵan munaı gazyn bólý tártibine baılanysty daý týyndap, oblystyq energetıka jáne turǵyn úı kommýnaldyq sharýashylyq basqarmanyń áreketterine quqyqtyq baǵa berilmek.
Qazaqstan Respýblıkasy Básekelestikti qorǵaý jáne damytý agenttiginiń málimetinshe, tergep-tekserý suıytylǵan munaı gazyn bólý jáne jetkizý josparyn qalyptastyrý kezinde jergilikti atqarýshy organdardyń áreketterine júrgizilgen taldaý nátıjesinde qolǵa alynǵan.
Buǵan deıin departament basqarmanyń atyna básekelestikti qorǵaý salasyndaǵy zańnamany buzý belgileriniń bar ekendigi týraly habarlama joldaǵan. Alaıda belgilengen merzim ishinde habarlamada kórsetilgen talaptardy oryndaý boıynsha tıisti sharalar qabyldanbaǵan. Osyǵan baılanysty Qazaqstan Respýblıkasynyń zańnamasyna sáıkes tergep-tekserý bastaldy.
Qazirgi ýaqytta quqyq buzýshylyq belgileriniń bar-joǵyn rastaý nemese joqqa shyǵarý maqsatynda materıaldardy jınaý jáne taldaý jumystary júrgizilýde. Atap aıtqanda, mynadaı yqtımal faktiler tekserilip jatyr:
• naryqtyń jekelegen qatysýshylaryna artyqshylyqtar men jeńildikter berý;
• jekelegen naryq sýbektileri úshin artyqshylyqty jaǵdaılar jasaý;
• básekelesterge qatysty kemsitýshilik jaǵdaılar qalyptastyrý.
- Tergep-tekserý Qazaqstan Respýblıkasy Kásipkerlik kodeksiniń 194-baby 2-tarmaǵynyń 9-tarmaqshasyna sáıkes júrgizilip jatyr. Onyń qorytyndysy boıynsha qoldanystaǵy zańnama aıasynda tıisti sharalar qabyldanady, - dep málimdedi agenttik.
Buǵan deıin elde taýarlyq gazdy tıimdi paıdalaný úshin halyqqa arnalǵan áleýmettik tutyný normalaryn belgileý usynylǵanyn jazǵan edik.
