Atyraýda avtobýs júrgizýshisin soqqyǵa jyqqan er adamǵa qatysty tergeý bastaldy

ATYRAÝ. KAZINFORM – Atyraýda qoǵamdyq kóliktiń júrgizýshisin balaǵattap, soqqyǵa jyqqan er adam ustaldy. Polıtsııa qyzmetkerleri buzaqyǵa qatysty sotqa deıingi tergeýdi bastady.

Atyraý oblystyq Polıtsııa departamentiniń baspasóz qyzmetinen málim etkendeı, avtobýs júrgizýshisin soqqyǵa jyqqan er adamnyń jasy – 47-de.

«Búgin, 5 naýryz kúni saǵat 14:40 shamasynda 47 jastaǵy er adam №22 baǵytta qatynaıtyn qoǵamdyq kóliktiń júrgizýshisine kúsh qoldanyp, uryp-soqqan. Qazir 49 jastaǵy júrgizýshige keltirilgen dene jaraqatyn anyqtaý maqsatynda sot-medıtsınalyq saraptama taǵaıyndaldy. Ustalǵan kúdiktige qatysty buzaqylyq deregimen sotqa deıingi tergep-tekserý amaldary bastaldy», - dep habarlady departamenttiń baspasóz qyzmeti.

Buǵan deıin Atyraýda avtobýs júrgizýshisiniń soqqyǵa jyǵylǵanyn habarlaǵan edik. Er adamnyń avtobýs júrgizýshisine qol jumsaǵany týraly Instagram jelisinde vıdeo tarady. «Smart-Atyraý» KMK dırektory Arslan Aronovtyń aıtýynsha, avtobýs júrgizýshisi polıtsııaǵa shaǵym túsiredi.

«Avtobýsqa mingen er adam júrgizýshige dórekilik tanytyp, qol jumsady. Soqqynyń saldarynan júrgizýshiniń beti men kózi isti. Avtobýs júrgizýshisi polıtsııaǵa shaǵym túsiredi. Al buzaqylyq jasaǵan jolaýshy valıdatordy syndyrdy», - dep málim etti Arslan Aronov.