Atyraýda aýtızmmen aýyratyn balanyń anasy memlekettik mekemeni ótemaqy tóleýge sot arqyly mindettedi
ATYRAÝ. KAZINFORM – Atyraý qalasynyń turǵyny, tórt balanyń anasy, «balalyq shaqtaǵy aýtızm» dıagnozymen 2024 jyly II toptaǵy densaýlyǵy boıynsha múmkindigi shekteýli dep tanylǵan 8 jasar qyzynyń oqý aqysyn óteýdi surap, sotqa shaǵymdanǵan. Qyzdy úıde oqytý usynylǵan.
Joǵarǵy sottyń málimetinshe, ýákiletti organ ótemaqy ótinish bergen kúnnen bastap tólenetinin alǵa tartyp, 2024 jyldyń sońǵy tórt aıy úshin tóleýden bas tartyp, 2025 jyldyń bes aıy úshin ǵana oqý aqysyn óteýdi taǵaıyndaǵan. Qala ákimi de kómek kórsetýden bas tartqan.
Talap qoıýshy múmkindigi shekteýli balanyń oqýy úshin memleketten ótemaqy alý quqyǵyn bilmegenin túsindirgen. Bul múmkindikti bilgen boıda ol dereý ýákiletti organǵa habarlasqan. Alaıda ýákiletti organnyń ózi oǵan 2025 jylǵa deıin bul qoldaý sharasynyń bar ekendigi týraly habarlamaǵan.
Sot balanyń 2024-2025 oqý jyly boıyna úıde oqytylǵanyn anyqtady. Talap qoıýshynyń shekken shyǵyndaryn óteý quqyǵyn eskerip, ádildik pen parasattylyq qaǵıdattaryn basshylyqqa ala otyryp, sot talap qoıýdy qanaǵattandyryp, ýákiletti organǵa balanyń 2024 jyldyń tórt aıy ishinde úıde oqytýǵa ketken shyǵyndaryn óteý arqyly buzýshylyqty joıýdy mindettedi.
Sheshim Atyraý oblystyq sotynyń memlekettik organnyń tólemderden bas tartý áreketin zańsyz dep tanyǵan qaýlysy negizinde zańdy kúshine endi.
Aıta keteıik, Atyraýda zeınetaqy qarajatyn zańsyz aınaldyrý deregine qatysty aýqymdy operatsııa bastaldy.