Atyraýda aýyl balalary mektepte emes, úsh mekemeniń bólmesinde oqyp júr

Atyraý oblysyndaǵy Isataı aýylynyń balalary mektepte emes, úsh mekemeniń bólmesinde oqyp júr. Sabaq 35 mınýtqa qysqartylǵan, dep habarlaıdy Kazinform.

Isataı aýdanyndaǵy Isataı aýylynda 1 468 adam turady. Munda 320 oryndyq mektep, balabaqsha, mádenıet úıi, dárigerlik ambýlatorııa bar.

Bilim ordasyna Isataı batyrdyń aty berilgen.

Bıyl mamyrda mektepte bastalǵan kúrdeli jóndeý jumysy baıaý júrip jatyr.

Sol sebepten aýyldaǵy oqýshylar mektepte emes, ózge úsh mekemeniń bólmelerinde oqýǵa májbúr bolyp otyr. Sabaqtyń uzaqtyǵy 35 mınýtqa qysqartylǵan.

Atyraý oblysynyń ákimi Serik Shápkenov búgin Isataı aýylynyń turǵyndarymen kezdesti. Mekteptegi kúrdeli jóndeý jumysymen tekserdi.

«Aýyldaǵy 320 oryndyq mektepti kúrdeli jóndeý jumystary mamyr aıynda bastaldy. Jıynǵa kelmes buryn mektepke arnaıy baryp, merdigerdiń jumysymen tanystym. Jóndeý jumystarynyń kestege saı júrgizilmeýinen balalar sapaly bilim ala almaı otyr. Bul bilim sapasyna keri áserin tıgizedi. Merdiger mekeme – «GrandStroıServıs» JShS bilim ordasyndaǵy jóndeý jumysyn 2024 jyldyń 7 qańtarynda aıaqtaýy tıis. Biraq oqytý júıesindegi yńǵaısyzdyqty joıý úshin jyl sońyna deıin aıaqtaýdy tapsyrdym», -dedi Serik Shápkenov.

Ákimniń aıtýynsha, Isataı aýylynda kelesi jyly sport kesheniniń qurylysy bastalady. Qazir nysannyń jobalyq-smetalyq qujattamasy daıyn tur.

Al, mádenıet úıi men balabaqsha ǵımaraty eskirgen. Sol sebepten, jańa nysandar salý úshin qajetti qujattardy jınaqtaý kózdelgen.

Aýyl turǵyndary birneshe máseleni qozǵady. Aýylda ınternet jelisiniń sapasy tómen. Sondaı-aq, aýyldy kógaldandyrý, temirjol vokzalynyń qyzmet kórsetý deńgeıin kóterý qajet.

Eske sala ketelik, budan buryn Atyraýda shatyry tesik mekteptiń ǵımaraty buzylatynyn jazǵan edik.