Atyraýda aýdandyq ákimdiktiń aýla sypyrýshysy aǵash kesý kezinde jaraqat alǵan

ATYRAÝ. KAZINFORM – Atyraý oblysyndaǵy Qurmanǵazy aýdandyq ákimdiginiń aýla sypyrýshysy aǵash kesý kezinde jaraqat alǵan. Qazir aýrýhanada jatyr. 

Bul derekti Qurmanǵazy aýdany ákiminiń baspasóz qyzmeti rastady. Oqıǵa 22 qańtarda bolǵan.

– Qurmanǵazy aýdany ákimi apparatynyń aýla sypyrýshysy ákimdik terrıtorııasynda aǵash butaǵyn kesý kezinde jaraqat aldy. Ol aldymen aýdandyq aýrýhanaǵa jatqyzyldy. Keıin Atyraý oblystyq aýrýhanasyna aýystyryldy. Jumys berýshi zańdylyqqa sáıkes materıaldyq jáne quqyqtyq kómek berýge qoldaý kósretti. Atalǵan derek memlekettik eńbek ınspektsııasyna, quqyq qorǵaý organdaryna habarlandy. Qazir qajetti tekserý júrip jatyr, - dep habarlady aýdandyq ákimdiktiń baspasóz qyzmeti. 

Eske sala ketelik, budan buryn Atyraýdaǵy qurylys alańynda 2 jumysshy 5-qabattan qulap, 1-eýi kóz jumǵanyn jazǵan edik.