Atyraýda aýdan bıligi tozyǵy jetken nysandy 389 mln teńgege satyp almaq bolǵan
ATYRAÝ.KAZINFORM — Atyraý oblysy Jylyoı aýdany ákimdigi tozyǵy jetken ǵımaratty 389 mln teńgege satyp almaq bolǵan. Jylyoı aýdanynyń prokýratýrasy aýdan ákimdiginiń bıýdjet qarajatyn negizsiz josparlaý jáne jumsaý dereginiń jolyn kesti.
Prokýratýranyń málimetinshe, aýdandyq bıýdjet komıssııasy 2025 jyldyń sońynda sport keshenin satyp alýǵa 389 mln teńge bólýdi maquldanǵan. Degenmen qadaǵalaý organy ákimdik satyp alýdy josparlaǵan nysannyń tozyǵy jetken kúıde ekenin anyqtaǵan.
— Nysandy satyp alǵannan keıin ony jóndeýge bıýdjetten qosymsha qarjy talap etiledi, bul eki ese shyǵynǵa ákep soǵady.Atalǵan jobany iske asyrý bıýdjet qarajatyn utymdy josparlaý jáne tıimdi paıdalaný prıntsıpterine qaıshy keledi. Prokýrorlyq qadaǵalaý aktisi boıynsha sheshimniń kúshi joıylyp, bıýdjet qarajatynyń negizsiz jumsalýyna jol berilmedi, -dep málimdedi oblys prokýratýrasynyń baspasóz qyzmeti.
Buǵan deıin Atyraý ákimdigi nelikten 16 mln teńgege ǵımarat jaldap otyrǵanyn jazǵan edik.
