Atyraýda aýadaǵy kúkirtti sýtegi shekti mólsherden asyp ketti
ATYRAÝ. KAZINFORM – Atyraýda aýadaǵy kúkirtti sýteginiń shamadan tys asý deregi tirkelgen. Búgin onyń mólsheri ruqsat etilgen shekti shoǵarlanýdan 16 esege deıin artqan.
Atyraý qalasynyń turǵyndary sońǵy eki-úsh kúnnen beri álýemettik jelide aýada jaǵymsyz ıis shyqqanyna shaǵym aıtyp jatyr.
Osyǵan oraı, búgin, 25 naýryzda Atyraý oblysy boıynsha ekologııa departamenti aýa sapasyna júrgizilgen monıtorıngtiń málimetin jarııalady.
«Departamenttiń zerthanalyq-taldamaly baqylaý bóliminiń mamandary Atyraý qalasynda atmosferalyq aýadaǵy jaǵymsyz ıiske baılanysty shahar aýmaǵynda ornalasqan aýa sapasyn baqylaý stansalarynda monıtorıng jumysyn júrgizdi. «Air kz» jelisi málimetine sáıkes, 25 naýryz kúni kúkirtti sýtegi №112 «Akımat», №113 «Avangard», №109 «Vostok» avtomattandyrylǵan aýa sapasyn baqylaý stansalarynda ruqsat etilgen shekti shoǵyrlanýdan 16 esege deıin asý faktisi tirkeldi», -dep habarlady departamenttiń baspasóz qyzmeti.
Máselen, búgin tańerteńgi saǵat 07:00-de №112 «Akımat» stansasynda kúkirtti sýteginiń mólsheri 125 mkg/tekshe metrdi kórsetken. Dál osy ýaqytta «Avangard» shaǵyn aýdanynda bul kórsetkish 49,3 mkg/tekshe metr bolǵan. Al, Al, saǵat 06:00-de «Turǵyn úı qalashyǵy» shaǵyn aýdanyndaǵy aýa sapasyn baqylaý stansasynda kúkirtti sýteginiń mólsheri bul kórsetkish 51,2 mkg/ tekshe metr bolyp tirkelgen.
«Atyraý qalasynyń oń jaq bóliginde «Kvadrat» sý býlaný alańy bar. «Tazalyq» baǵdarlamasymen sý býlaný alańyn qalpyna keltirý jumystary (rekýltıvatsııa) júrgizilip jatyr. «Qazgıdromet» RMK Atyraý fılıaly synaq zerthanasynyń mamandarymen birge Atyraý qalasynyń aýa sapasyna monıtorıng jumystaryn júrgizý jalǵasady», -dep málim etti departamenttiń baspasóz qyzmeti.
Eske sala ketelik, budan buryn Atyraýdaǵy Mııaly aýylynyń kóshelerin erigen qar sýy basqanyn jazǵan bolatynbyz.
