Atyraýda qoqys shyǵarý qyzmetine qaryz 90 mln teńgege jýyqtady
ATYRAÝ. KAZINFORM – Atyraý turǵyndarynyń qoqys shyǵarý qyzmeti úshin «Arnaýly avtobaza» JShS aldyndaǵy bereshegi 90 mln teńgege jýyqtady. Kásiporyn málimetinshe, boryshkerlerge aldymen eskertý jasalady. Al bereshek belgilengen merzimde ótelmese, ony óndirip alý úshin is jeke sot oryndaýshylaryna joldanady.
Kásiporynnyń málimetinshe, turǵyndar arasynda qurylys jáne iri kólemdi qaldyqtardy arnaıy polıgondarǵa aparmaı, kópqabatty úılerdiń mańyndaǵy konteınerlerge tastaý derekteri kezdesedi. Sondaı-aq qoqys shyǵarý qyzmetiniń aqysyn ýaqytynda tólemeıtinder de bar. «Arnaýly avtobaza» JShS abonenttik bóliminiń basshysy Ǵalııa Esqalıevanyń aıtýynsha, aldymen boryshkerlerge eskertý jasalady.
– Qyzmetkerler kún saıyn turǵyndarmen baılanysyp, telefon arqyly habarlasady, eskertý jasap, tıisti qujattardy joldaıdy. Eger belgilengen merzimde tólem jasalmasa, materıaldar Qazaqstan Respýblıkasynyń zańnamasyna sáıkes jeke sot oryndaýshylaryna beriledi, – dedi ol.
Kásiporyn málimetine sáıkes, táýligine orta eseppen 200-300 tonna turmystyq qatty qaldyq shyǵarylady. Jaz mezgilinde bul kólem 600 tonnaǵa deıin ulǵaıady. Onyń shamamen 200 tonnasy polıgonda kómiledi, 100 tonnasy qoqys suryptaý keshenine jetkiziledi. Al suryptalǵan qaldyqtyń 6 paıyzy ǵana qaıta óńdeledi.
Qazir qalada 25 qoqys tasıtyn arnaıy tehnıka jumys isteıdi. Bıyl avtopark JAC markaly 7 jańa kólikpen tolyqtyrylǵan. Jalpy shahar ishinde 5600 qoqys konteıneri ornatylǵan.
Buǵan deıin óńirde zańsyz qoqys úıindileri úshin 7 ákim jaýapqa tartylǵanyn jazǵan edik.
