Atyraýda aýadaǵy kúkirtsýteginiń mólsheri normadan 10 ese asty
ATYRAÝ. KAZINFORM – Keshe keshkilik Atyraý turǵyndary qalada jaǵymsyz ıistiń taralǵanyna shaǵymdandy.
Osyǵan baılanysty júrgizilgen zerthanalyq baqylaý barysynda qalanyń oń jaǵyndaǵy «Kvadrat» býlaný alańy mańynda aýadaǵy kúkirtsýteginiń mólsheri ruqsat etilgen shekti shoǵyrlanýdan 10 ese asqany anyqtaldy.
Ekologııa departamentiniń málimetinshe, 8 shildede zerthanalyq-taldamaly baqylaý bóliminiń mamandary turǵyndardyń shaǵymyna baılanysty Atyraý qalasynyń birneshe núktesinde atmosferalyq aýa sapasyna monıtorıng júrgizdi.
Aýa synamalary «QazTransOıl» AQ-nyń T.Qasymov atyndaǵy munaı aıdaý stantsııasynyń sanıtarlyq-qorǵaý aımaǵynan tys aýmaqtan, «Atyraý oblysy Sý Arnasy» KMK-ne qarasty kárizdik sorǵy stantsııasy mańynan, qalanyń oń jaǵyndaǵy «Kvadrat» býlaný alańynyń sanıtarlyq-qorǵaý aımaǵynan tys jerden jáne Nursaıa yqshamaýdanynan alyndy.
Zerthanalyq baqylaý barysynda aýa quramyndaǵy kúkirtsýtegi, kómirtek oksıdi, azot oksıdi, kúkirt dıoksıdi jáne metannyń mólsheri tekserildi. Monıtorıng kezinde aýa temperatýrasy +25 gradýs bolyp, jel soltústik jáne soltústik-batys baǵyttan sekýndyna 5 metr jyldamdyqpen soqqan, aýanyń salystyrmaly ylǵaldylyǵy 54 paıyzdy qurady.
Tekserý nátıjesinde qalanyń oń jaǵyndaǵy «Kvadrat» býlaný alańynyń sanıtarlyq-qorǵaý aımaǵynan tys aýmaqta kúkirtsýteginiń mólsheri ruqsat etilgen shekti shoǵyrlanýdan 10 ese asqany anyqtaldy. Qalǵan baqylaý núktelerinde alynǵan synamalar boıynsha mundaı asyp ketý tirkelmegen.
– Atalǵan faktiler boıynsha gıgıenalyq normatıvterdiń buzylýyna jol bergen tabıǵat paıdalanýshyǵa qatysty zańda kózdelgen sharalardy qabyldaý úshin jınaqtalǵan qujattar Atyraý oblysynyń Sanıtarııalyq-epıdemıologııalyq baqylaý departamentine joldanady, – dep habarlady Atyraý oblysy boıynsha ekologııa departamenti.
Eske salaıyq, 8 shilde kúni keshke Atyraý qalasynyń turǵyndary áleýmettik jelilerde aýada jaǵymsyz ıistiń taralǵanyna shaǵymdanǵan bolatyn. Osydan keıin óńirdegi ýákiletti organdar atmosferalyq aýa sapasyna kezekten tys baqylaý jumysyn júrgizgen edi.
