Atyraýda aýadaǵy kúkirtsýteginiń mólsheri normadaǵydan 22 esege asqan

ATYRAÝ. KAZINFORM – Atyraý qalasynyń birneshe bóliginde, «Kvadrat» býlaný alańynda aýa quramyndaǵy kúkirtsýteginiń úlesi normadaǵydan birneshe esege asyp ketken. 

Atyraý oblystyq ekologııa departamenti baspasóz qyzmetiniń málimetinshe, 18 shildege qaraǵan túngi saǵat 00:00-den tańǵy saǵat 09:00-ge atmosferalyq aýa sapasyn baqylaıtyn birneshe stansadaǵy málimetke monıtorıng júrgizilgen. 

– Monıtorıg «Qazgıdromet» RMK Atyraý oblystyq fılıalynyń mamandarymen birge júrgizildi. Máselen, kúkirtsýteginiń úlesi №103 «Shaǵala», №109 «Vostok», №110 «Prıvokzalnyı», №111 «Jılgorodok», №112 «Akımat», №113 «Avangard», №114 «Zagorodnaıa», «Hımposelok» stansasynda ruqsat etilgen shekti shoǵyrlanýdan 5,2 esege deıin asqany tirkeldi. Kúkirtsýteginiń módsheri 17 shildede «Kvadrat» sý býlaný alańynda 22 esege, basty kárizdik sorǵy tazartý stantsııasynda 5 esege asqany anyqtaldy. Eldi-mekender aýmaǵynda atmosferalyq aýanyń normadan tys joǵary deńgeıde lastanýyna jol bergen «Atyraý oblysy Sý arnasy» KMK-ǵa tekseris júrgizildi, - dep habarlady departamenttiń baspasóz qyzmeti. 

Jınaqtalǵan qujattar Atyraý oblysynyń sanıtarııalyq-epıdemıologııalyq baqylaý departamentine joldanǵan. 

Eske sala ketelik, buǵan deıin Atyraýdyń ekologııasy jaqsarmaı turǵanyn jazǵan edik.