Atyraýda aýa temperatýrasy +43 gradýsqa deıin kóterilip, qatty ystyq bolýy múmkin
ATYRAÝ. KAZINFORM – Sınoptıkter men dárigerler atyraýlyqtarǵa aýa temperatýrasynyń +43 gradýsqa deıin kóterilýi múmkin ekenin eskertti.
«Qazgıdromet» RMK-nyń Atyraý oblystyq fılıaly aýa-raıyn boljaý bóliminiń basshysy Aına Qazǵulovanyń aıtýyna qaraǵanda, shilde aıynda aýa temperatýrasy klımattyq normadan joǵary bolýy múmkin.
– Atyraý oblysynda aılyq ortasha temperatýranyń qalypty kórsetkishi +25,6°S - +27,9°S aralyǵynda bolady. Alaıda bıyl +26,9°S pen +29,1°S aralyǵynda qubylady. Bul kórsetkish kópjyldyq ortasha mánnen shamamen +1 gradýsqa joǵary bolǵaly otyr. Biraq, shilde aıynyń ekinshi jáne úshinshi onkúndiginde kún qatty ysıdy. Aýa temperatýrasy +38°S-tan +43°S-qa deıin kóteriledi. Osy kúnderi túngi mezgilde qatty salqyn bolmaıdy. Túngi aýa temperatýrasy +22°S pen +27°S aralyǵynda saqtalady, - deıdi Aına Qazǵulova.
Keıingi kúnderi aýa raıynyń kúrt ysyǵany baıqalyp otyr. Atyraý oblystyq densaýlyq saqtaý basqarmasynyń shtattan tys bas terapevti Meıirgúl Kenjeǵalıeva osyǵan baılanysty dárigerler turǵyndarǵa, ásirese, balalarǵa, qarttar men sozylmaly aýrýy bar adamdarǵa barynsha saqtyq bolýdy eskertti.
– Aýa temperatýrasynyń joǵarylaýy aǵzanyń tez sharshaýyna, qan qysymynyń kóterilýine, júrek-qan tamyrlary jumysynyń álsireýine ákelip soqtyrýy múmkin. Osy kezeńde turǵyndar kóleńkede júrýi, bas kıim kıip, suıyqtyqty kóp mólsherde tutynýy tıis. Kúnniń eń qyzǵan ýaqyty – saǵat 11:00 men 17:00 aralyǵynda dalada uzaq bolmaǵan jón, - deıdi Meıirgúl Kenjeǵalıeva.
Eske sala ketelik, buǵan deıin 11 shildege arnalǵan aýa raıy boljamy habarlanǵan bolatyn.