Atyraýda aýa sapasynyń nasharlaýyna áser etetin negizgi faktorlar ataldy
ATYRAÝ. KAZINFORM — Atyraýda qyrkúıektiń alǵashqy eki aptasynda atmosferalyq aýa monıtorıngi barysynda keıbir beketterde lastaýshy zattardyń shoǵyrlanýy tirkeldi. Qaladaǵy aýa sapasyna qatysty másele ásirese kúkirtti sýteginiń joǵary kontsentratsııasymen baılanysty bolyp otyr.
Atyraýda kúkirtti sýtegimen lastanýǵa birneshe faktor áser etedi. Ekologııa jáne tabıǵı resýrstar mınıstrliginiń aqparatyna súıensek, negizgi oshaqtardyń qatarynda «Atyraý oblysy Sý Arnasy» KMK-nyń káriz nysandary, «Kvadrat» býlaný alańy, jylytý qazandyqtary men jylý elektr ortalyǵy bar.
Máseleni kúrdelendiretin faktordyń biri — qolaısyz meteorologııalyq jaǵdaı. Jeldiń báseńdeýi, ásirese túngi ýaqytta aýanyń nashar almasýy lastaýshy zattardyń taralýyn qıyndatady. Mundaı kezde olardyń kontsentratsııasy qysqa merzim ishinde joǵarylaýy múmkin.
Ekologııa organdarynyń málimetinshe, qoldanystaǵy zańnama talaptary buzylǵan jaǵdaıda jospardan tys tekserýler júrgiziledi. Atap aıtqanda, 8 qyrkúıekte Atyraý qalasyndaǵy atmosferalyq aýanyń sapasyna baılanysty jospardan tys tekserý bastalǵan edi.
Ekologııa jáne tabıǵı resýrstar mınıstrligi aýa sapasyn baqylaý úshin iri tabıǵat paıdalanýshylardyń birqatar kásipornynda avtomattandyrylǵan monıtorıng júıeleri ornatylǵanyn atap ótti. Bul júıelerden alynǵan málimetter Qazaqstan Respýblıkasynyń qorshaǵan ortasy men tabıǵı resýrstarynyń jaı-kúıi týraly Ulttyq derekter bankine beriledi.
— Qol jetimdi eń jaqsy tehnıkany, kásiporyndarda monıtorıngtiń avtomattandyrylǵan júıesin engizý, qoldanystaǵy zańnamanyń talaptaryn saqtaý atmosferalyq aýanyń lastaný deńgeıin tómendetýge múmkindik beredi, — dep málimdedi mınıstrlik.
Alaıda qaladaǵy aýany lastaıtyn oshaqtar birneshe jyldan beri belgili bolsa da, kúkirtti sýtegi máselesi áli de ózekti bolyp otyr. Sondyqtan turǵyndar úshin monıtorıng nátıjesiniń ózi ǵana emes, anyqtalǵan lastaný kózderin azaıtý boıynsha qabyldanǵan sharalardyń naqty nátıjesi de mańyzdy.
Qazir Atyraý oblysynda atmosferaǵa shyǵaryndylardy azaıtý, ınfraqurylymdy jańǵyrtý jáne ekologııalyq baqylaýdy kúsheıtý baǵytynda jumystar júrgizilip jatyr. Biraq aýa sapasyna qatysty shaǵymdardyń qaıtalanýy qabyldanyp jatqan sharalardyń tıimdiligin turaqty baǵalaýdy qajet etedi.
Quryltaı depýtaty Arman Haırýllın Atyraýda aýa sapasynyń nasharlaýyna baılanysty pikir bildirip, máseleni sheshý úshin birqatar usynys aıtty.
Buǵan deıin Atyraýda aýa quramyndaǵy keıbir aromatty kómirsýtekterdiń mólsheri túngi ýaqytta ruqsat etilgen shekten 10-15 esege deıin artqany anyqtaldy. Oblystyq ekologııa departamenti sasyq ıis Atyraý munaı óńdeý zaýytynan dep otyr.
