Atyraýda ata-analardy alańdatqan №20 mekteptiń taǵdyry keler jyly ne bolmaq
ATYRAÝ. KAZINFORM – Jylyoı aýdany Qulsary qalasyndaǵy №20 mekteptiń taǵdyryna qatysty ata-analardyń alańdaýshylyǵy ázirge tolyq seıilgen joq. Bılik bilim oshaǵy 2026–2027 oqý jylynda jabylmaıtynyn málimdegenimen, oqýshy sany azaısa, keıin mektepke qatysty sheshim qabyldanýy múmkin.
«Avtojolshylar» yqshamaýdanyndaǵy №20 mekteptiń bolashaǵy birneshe aıdan beri ata-analardy alańdatyp keledi. Bıyl munda 300-ge jýyq oqýshy bilim alady. Byltyr olardyń sany 370-ke jýyq bolǵan.
Oqýshylardyń azaıýyna «Atyraý» yqshamaýdanynda jańadan ashylǵan 1200 oryndyq «Keleshek» mektebi áser etip otyr. Qazir oǵan 850-ge jýyq oqýshy qabyldanǵan, qabyldaý áli jalǵasyp jatyr.
- №20 jalpy orta bilim beretin mektep jabylmaıdy, óz qyzmetin dástúrli túrde jalǵastyrady. Eger mektepte balalar sanynyń azaıýy baıqalsa, mektepke qatysty tıisti sheshim qabyldanady, – dedi Jylyoı aýdany ákiminiń orynbasary Gúlnafıs Aıshýaqova.
Osylaısha, mektep bıyl jumysyn jalǵastyrǵanymen, onyń keıingi taǵdyry oqýshy sanyna baılanysty bolmaq. Bul ata-analardyń alańdaýyn tolyq seıiltpeıdi.
Aıta keteıik, 1993 jyly ashylǵan №20 mektepke 180 oryndyq qosymsha ǵımarattyń qurylysy bıyl ǵana aıaqtalǵan. Jańa ǵımaratta sport jáne akt zaldary, ashana men pán kabınetteri qarastyrylǵan.
Eske salaıyq, buǵan deıin Atyraý qalasyndaǵy qurylysy 4 jylǵa sozylǵan bilim ordasynyń jańa oqý jylynda jumysyn bastaýyna qatysty ata-analar tarapynan kúmán bolǵan edi. Keıin bilim berý basqarmasy Kóktem-2 yqshamaýdanynda ornalasqan jalpy bilim beretin № 53 mektep 1 qyrkúıekten jumysyn bastaýǵa tolyq daıyn ekenin málimdedi.
