Atyraýda ata-analar ındýstrııaldy kolledjdiń jabylýyna qarsylyq bildirip jatyr
ATYRAÝ. KAZINFORM – Atyraý ındýstrııaldy kolledjin Atyraý energetıka jáne qurylys kolledjine qosý týraly sheshim ata-analar men stýdentterdiń narazylyǵyn týdyrdy. 541 stýdent bilim alyp jatqan oqý ornynyń bolashaǵyna qatysty másele ázirge túpkilikti sheshilmegenimen, taraptar mundaı ózgeristiń sebebin túsindirýdi talap etip otyr.
Birneshe kúnnen beri Atyraý ındýstrııaldy kolledjiniń stýdentteri, olardyń ata-analary men oqý orny qyzmetkerleriniń mazasy qashqan. Óıtkeni kolledj jabylyp, stýdentterdi Atyraý energetıka jáne qurylys kolledjine aýystyrý josparlanyp otyrǵany týraly aqparat taraǵan.
Ata-analar men stýdentterdiń aıtýynsha, bul jańalyq olarǵa kúni keshe ǵana belgili bolǵan. Tehnıkalyq jáne kásiptik bilimdi tegin alyp jatqan jastar mundaı sheshimmen kelispeıtinin jetkizdi. Al ata-analar balalardyń qaýipsizdigine jáne mundaı ózgeristiń sebebi túsindirilmegenine alańdaýly.
– Kolledjdiń jabylatyny týraly keshe ǵana estidik. Aldyn ala eskertý bolǵan joq. Elde jumysshy mamandyqtaryn damytý týraly aıtylyp jatqanda, eńbek naryǵyna qajetti kadrlardy daıarlaıtyn oqý ornyn jabý durys emes dep sanaımyz. Qoldaýdyń ornyna jastardy basqa oqý ornyna aýystyrmaq. Bul kolledjde eki jańa óndiristik tseh ashyldy. Sol kezde balalarymyz úshin jasalyp jatqan jaǵdaıǵa qýanǵan edik, – dep pikir bildirdi oqý orny aldyna jınalǵan ata-analar.
Atyraý ındýstrııaldy kolledji oblystyq bilim berý basqarmasynyń balansynda. Munda kompıýterlik aqparattyq qamtamasyz etý operatory, elektr montajdaýshy, tehnık-elektrık, dánekerleýshi, tehnık-mehanık, kran mashınısi, tehnık-qurylysshy jáne keń beıindi qurylys jumystarynyń sheberi sekildi mamandyqtar boıynsha kadr daıarlanady. Oqý – tegin. Sonymen qatar oqý ornynda múmkindigi shekteýli stýdentter de bilim alady.
Ata-analardyń biri Gúlnaz Nyǵmettiń aıtýynsha, kolledjdiń jabylýy stýdentterdiń jańa ortaǵa beıimdelýine qıyndyq týdyrýy múmkin.
– Eki balam da osy kolledjde «elektrık» mamandyǵy boıynsha bilim alyp jatyr. Oqý ornynyń ne sebepti jabylatynyn eshkim túsindirgen joq. Biz kolledjdiń jabylǵanyn qalamaımyz. Balalarymyz basqa oqý ornyna aýyssa, stýdentter arasynda túsinispeýshilik bolýy múmkin, – deıdi ol.
Osy máselege baılanysty oblystyq bilim berý basqarmasy túsinik berdi. Basqarmanyń málimetinshe, másele úsh mınıstrliktiń birlesken buıryǵynda kórsetilgen «kadrlarǵa óńirlik qajettilikti eskere otyryp, tehnıkalyq jáne kásiptik bilim berý uıymdaryn beıindeý» tapsyrmasyna baılanysty kóterilgen.
– Osy tapsyrmaǵa sáıkes Atyraý ındýstrııaldy kolledjin Atyraý energetıka jáne qurylys kolledjine qosý arqyly qaıta uıymdastyrý jumysy týraly hat 15 maýsym kúni Atyraý ındýstrııaldy kolledjine joldandy. Qazirgi ýaqytta hat qaraýsyz qaldy. Aldaǵy ýaqytta bul másele jan-jaqty talqylanyp, oń sheshim qabyldanady, – dep málimdedi oblystyq Bilim berý basqarmasynyń baspasóz qyzmeti.
Qazir bul kolledjde 77 qyzmetker eńbek etedi. Bilim ordasynda 541 stýdent oqıdy. Onyń 262-si bıyl oqýyn aıaqtap, eńbek naryǵyna joldama almaq.
