Atyraýda ata-analar eski mektepti buzýǵa qarsy
ATYRAÝ. KAZINFORM — Atyraý qalasyndaǵy № 30 mektep-gımnazııasynyń ǵımaratyn buzý týraly sheshimge ata-analar qarsylyq bildirip jatyr. Olardyń aıtýynsha, bilim ordasyn apatty dep taný jáne buzý jónindegi bıliktiń sheshimi tolyq zertteýge negizdelmegen.
1200 oryndyq mektep ǵımaraty 2002 jyly paıdalanýǵa berilgen. 2021 jyly shatyrdan sý ketip, ujym men oqýshylardy, ata-analardy ábigerge salǵan. 2022 jyly mektep jabylyp, qalanyń birneshe mektebinde oqý protsesin uıymdastyrý týraly sheshim qabyldanǵan.
2023 jylǵy jeltoqsanda «ZIGMUND» JShS ǵımarattyń tehnıkalyq jaǵdaıyna baǵalaý júrgizilip, nysandy apat aldyndaǵy jaǵdaıda dep tanydy. Alaıda qazirgi tańda atalǵan qorytyndynyń merzimi aıaqtalǵan.
Keıin Atyraý oblysynyń Qurylys, sáýlet jáne qala qurylysy basqarmasynyń tapsyrysy boıynsha «TALAP Engineering» JShS qaıtalama tehnıkalyq zertteý júrgizgen. Zertteý qorytyndysyna sáıkes ǵımarattyń fızıkalyq tozýy kórsetkishi — 71,0%, moraldyq tozýy — 83,6%. Nysandy qalpyna keltirý nemese qaıta jańartý tıimsiz dep tanylǵan.
-Biz mekteptiń shynymen apatty ekenine senimdi emespiz. Ǵımaratqa tolyq ınstrýmentaldy zertteý júrgizilmegen dep esepteımiz. Eger ýaqytynda shatyr jóndelgende, mundaı jaǵdaıǵa jetpes edik. Balalardyń oqý ordasyn buzý — eń sońǵy shara bolýy kerek dep esepteımiz.
Sonymen qatar ata-analardy jańa mekteptiń syıymdylyǵy máselesi alańdatyp otyr. Buǵan deıin 1200 oryndyq mekteptiń ornyna 600 oryndyq mektep salynatyny aıtylsa, qazir 1500 oryndyq «Jaıly mektep» salý jospary týraly aqparat tarady. Alaıda bul ózgeristerdiń naqty negizdemesi túsindirilmedi.
Mektepti tolyq jabý múmkin bolmaǵannan keıin onyń jaǵdaıyn nasharlatyp, qoldan kúıretý bastaldy. Gýmanıtarlyq jáne jaratylystaný baǵytyndaǵy synyptar biriktirilip, balalar profıldik bilimnen jáne UBT-ǵa daıyndalý múmkindiginen aıyryldy, — dedi ata-ana Baqytgúl Mámbetova.
Qazirgi ýaqytta oblystyq Qurylys, sáýlet jáne qala qurylysy basqarmasy 1500 oryndyq jańa mekteptiń jobalaý-smetalyq qujattamasyn ázirleý jumystaryn júrgizip jatyr. Bul joba aıasynda qoldanystaǵy ǵımaratty súrý kózdelgen.
- Ata-analar men balalardy jańylystyryp, olardy „Binom“ jekemenshik mektebine aýysýǵa májbúrledi, al endi qaıtyp oralǵysy kelgenderden bas tartyp jatyr. Balalardyń taǵdyryn bireýdiń jeke menshigindeı sheshýge kim quqyq berdi? Bilim basqarmasy tiri adamdar men olardyń bolashaǵy turǵanyn elemeı, mektep pen oqýshylarǵa qalaısha erkin bılik júrgizip otyr? Eń qorqynyshtysy — bizde syrtqy jaý emes, ishki nemquraılylyq pen tsınızm bar degen sezim. Mektepter qıraǵanda, tek ǵımarat emes — ádiletke jáne memleketke degen senim qıraıdy», — dedi ata-ana Baqytgúl Mámbetova .
Mektep qalanyń ortalyǵynda, Jaıyq ózeniniń mańynda ornalasqan. Janynda birneshe saıabaq ta bar. Nysannyń kommertsııalyq tartymdylyǵy kópke málim. Sondyqtan ata-analar mekteptiń jeri jekege ótip kete me dep áli kúnge alańdap otyr.
Bul máselege qatysty jergilikti atqarýshy organ ókilderi bilim ordasy buzylady, jańa mektep salynady dep sendirdi.
- Mektep kóp ýaqyttan beri turyp qalǵandyqtan onyń ornyna turǵyn úı kesheni salynady degen pikir aıtyldy. Bul shyndyqqa janaspaıdy. Jeri basqa maqsatqa paıdalanylmaıdy. Qazirgi ǵımarat buzylyp, ornyna jańa mektep salynady. Jobasy daıyndalyp jatyr. Óıtkeni, sarapshylar bizge ǵımaratty buzý kerektigi týraly qorytyndy shyǵaryp berdi. № 30 mektepke jaqyn jerde, „Jeńis“ saıabaǵynyń mańynda „Jaıyq“ Binom mektebi ashyldy. Ata-analaryn óz qalaýlaryna sáıkes, balalaryn sol mektepke berip jatyr. № 30 mektep zańdy memlekettik mektep retinde qalady. Jańa ǵımarat salynǵannan keıin ujym men oqýshylar qaıtip barady, - dedi Atyraý oblysy ákiminiń orynbasary Daryn Shamuratov.
Jýyqta ata-analar memleket basshysyna máseleniń mán-jaıyn baıandap, resmı ótinish joldaǵanyn aıta keteıik.
Búginde ata-analar balalardyń buzylǵan quqyqtaryn qalpyna keltirý jáne tıisti bilim berý protsesin qamtamasyz etý jóninde sharalar qabyldaýdy, oqýshylardy óz synyptaryna qaıta ornalastyrýdy suraıdy.
Biz osyǵan deıin aýyl men qala mektepteri arasyndaǵy bilim sapasy alshaqtyǵyn azaıtý úshin ne istelip jatqany jóninde jazǵan edik.