Atyraýda áskerı tehnıkanyń qozǵalysyna qatysty mınıstrlik túsinikteme berdi
ATYRAÝ. KAZINFORM — Atyraý oblysynda áleýmettik jelilerde áskerı tehnıkalardyń qozǵalysy túsirilgen foto men vıdeo tarap, kópshiliktiń nazaryn aýdartty.
Jeli qoldanýshylary Jylyoı aýdanynda baıqalǵan áskerı tehnıkalarǵa qatysty túrli jazbalar jarııalap, alańdaýshylyq bildirgen.
Osyǵan baılanysty Qazaqstan Respýblıkasynyń Qorǵanys mınıstrligi resmı túsinikteme berip, alańdaýǵa negiz joq ekenin málimdedi.
— Áýe shabýylyna qarsy qorǵanys bólimsheleriniń, sonyń ishinde temirjol kóligi arqyly oryn aýystyrýy jaýyngerlik daıarlyq is-sharalary aıasynda josparly túrde júzege asyrylýda. Qazirgi ýaqytta bólimshelerdiń mobıldiligin arttyrý, ózara úılesimdiligin jetildirý jáne belgilengen mindetterdi oryndaýǵa daıyndyǵyn arttyrý, sonyń ishinde birqatar mańyzdy nysandar men aýdandardy qorǵaý máseleleri pysyqtalýda, — dep habarlady Qorǵanys mınıstrligi.
Mınıstrliktiń bergen aqparatyna súıensek, mundaı is-sharalar Qarýly Kúshterdiń jaýyngerlik daıarlyǵynyń bir bóligi bolyp sanalady jáne bekitilgen josparǵa sáıkes turaqty túrde ótkiziledi.
Buǵan deıin Atyraýda áskerı qyzmetshi qaza tapqanyn jazǵan edik.
