Atyraýda áskerı mindetti azamattar Jaıyq jaǵalaýyn bekitýge shaqyrylyp jatyr

ATYRAÝ. KAZINFORM – Atyraýda mobılızatsııa jarııalanyp, áskerı mindetti azamattar Jaıyq ózeniniń jaǵalaýyn bekitý jumysyna shaqyryldy.

Atyraý oblysynyń jedel shtabynan málim etkendeı, áskerı mindetti azamattardy 20 sáýirde jaǵalaýdy bekitýge shaqyrý bastalǵan.

«Aýmaqtyq qorǵanys batalonynyń brıgadasyna Atyraý qalasy men 7 aýdannan áskerı mindetti 78 azamat shaqyryldy. Olarǵa Atyraý qalasyndaǵy Jaıyq ózeniniń oń jaǵalaýy bólinip berildi. Bul aýmaqta buryn eriktiler bóget kótergen edi. Qazir áskerı mindetti azamattar sol bógetti bıiktetý, nyǵaıtý jumysyna jumyldy. Olar 29 sáýirge deıin bógetti bekitýdi jalǵastyrady», - dedi batalon komandıri Rýslan Spanov.

Eske sala ketelik, Atyraý oblysynda jaǵalaýǵa 2,7 mln qum toltyrylǵan qap tóselgenin jazǵan bolatynbyz.