Atyraýda áskerı baǵyttaǵy «Sarmat» mektebinde tekserý júrip jatyr

ATYRAÝ. KAZINFORM — Atyraýda áskerı baǵytta bilim beretin «Sarmat» mektebinde qyzmettik tekserý bastaldy.

Áleýmettik jelide atalǵan mektep-lıtseıdiń tárbıeshisi oqýshynyń birin qorqytqany týraly aqparat tarady. Osyǵan baılanysty Atyraý oblystyq bilim basqarmasynyń baspasóz qyzmeti tekserý júrip jatqanyn habarlady. 

— Atyraý oblysyndaǵy «Sarmat» mamandandyrylǵan mektep-lıtseı-ınternatynda 236 oqýshy bilim alady. Oqýshylarǵa 39 muǵalim dáris beredi. Oqýshylardyń ınternattaǵy tártibin 19 tárbıeshi qadaǵalaıdy. Onyń ishinde 6 tárbıeshi túngi kezekshilikte jumys isteıdi. Mektep-lıtseı basshylyǵy men oqýshylardyń ata-analary arasynda qol qoıylǵan kelisim bar. Atalǵan oqýshy mektep-lıtseıde birneshe ret tártipsizdik jasap, eskertý alǵan. Oqýshy mektepishilik esepke alynǵan. Bul týraly ata-anasyna eskertilgen, — dep aqparat berdi basqarmanyń baspasóz qyzmeti.

Qazir oqýshy ata-anasynyń aryzyna tergeý amaldary júrip jatyr. 

— Bilim basqarmasy oqý-tárbıe protsesiniń uıymdastyrylýyna qatysty zerdeleý jumystaryn júrgizip jatyr. Oqýshyǵa psıhologııalyq kómek kórsetiledi, — dep málim etti basqarmanyń baspasóz qyzmetinen.

Eske sala ketelik, byltyr Atyraýda áskerı baǵytta oqytatyn «Sarmat» mektep-ınternaty ashylǵanyn habarlaǵan edik.