Atyraýda arnaıy jasaqtardyń taktıkalyq kópsaıysy bastaldy
ATYRAÝ. KAZINFORM – Atyraýda Qazaqstan Respýblıkasy Іshki ister mınıstriniń aýyspaly kýbogy úshin arnaıy maqsattaǵy bólimsheler arasynda ótetin IV taktıkalyq kópsaıys týrnıri bastaldy.
Oblys aýmaǵyndaǵy «Qarabotan» oqý ortalyǵyna elimizdiń ár óńirinen kelgen arnaıy jasaq ókilderi jınaldy. Dástúrli jarysqa Polıtsııanyń arnaıy maqsattaǵy bólimshelerinen 23 komanda jáne Ulttyq ulannan 2 komanda qatysyp jatyr. Osylaısha mınıstr kýbogy úshin barlyǵy 25 komanda baq synap jatyr.
QR Ulttyq ulany málimetinshe, týrnırge halyqaralyq deńgeıdegi jarystarda joǵary nátıje kórsetken arnaıy jasaq bólimsheleri de qatysyp jatyr. Olardyń qatarynda bıyl Dýbaıda ótken SWAT Challenge halyqaralyq týrnırinde úzdik atanǵan arnaıy bólimshe qyzmetkerleri bar.
Úsh kúnge josparlanǵan jarys barysynda qatysýshylar kásibı sheberlik, taktıkalyq daıyndyq, dáldik, shapshańdyq jáne tózimdilik boıynsha birneshe kezeńnen ótedi.
Taktıkalyq kópsaıystyń negizgi maqsaty – arnaıy maqsattaǵy bólimsheler qyzmetkerleriniń kásibı mashyqtaryn jetildirý, joǵary psıhologııalyq jáne fızıkalyq júkteme jaǵdaıyndaǵy tózimdiligin baǵalaý, bólimsheler arasyndaǵy ózara is-qımyldy damytý jáne úzdik komandalardy anyqtaý.
Bul dástúrli doda quqyqtyq tártip pen qoǵamdyq qaýipsizdikti qamtamasyz etetin kúshterdiń jaýyngerlik daıarlyǵyn shyńdaýǵa jáne tájirıbe almasýyna múmkindik beredi.
Týrnır qorytyndysy boıynsha úzdik nátıje kórsetken komanda Іshki ister mınıstriniń aýyspaly kýbogyna ıe bolady.
Buǵan deıin alty eldiń jastary qatysatyn «Aıbyn-2026» áskerı jıynyna daıyndyq qalaı júrgizilip jatqanyn jazǵan bolatynbyz.
