Atyraýda arnaıy jasaq basshylyǵy qaramaǵandaǵylardy balaǵattap, urǵan
ATYRAÝ.KAZINFORM - Áleýmettik jelilerde taraǵan beınejazbadan jyldam qımyldaıtyn arnaıy jasaq basshylyǵynyń qaramaǵyndaǵy qyzmetkerlerdi balaǵattap, qolyndaǵy zatpen urǵanyn baıqaýǵa bolady.
Aldyn ala málimet boıynsha taraptar arasyndaǵy bul jaǵdaı aqpan aıynda qyzmettik bólmede bolǵan. Olar basshylyq tarapynan kórsetilgen qurmetsizdik men qyzmettik laýazymdaryn asyra paıdalanǵany jóninde QR ІІM-ne hat jazǵan.
Aryzdanýshy taraptyń sózinshe, arnaıy jasaqtyń komandıri men rota komandırleri olarǵa beıádep sózder aıtyp, qolyndaǵy zatpen urǵan. Sol ýaqytta komandırlerdiń biri esikti ishinen jaýyp turǵan.
Atyraý oblysy polıtsııa departamentiniń baspasóz qyzmeti oqıǵany rastady.
- JQAJ qyzmetkeriniń qyzmettik tártipti buzý faktisi rastaldy. Qyzmetker tártiptik jaýapkershilikke tartyldy. Sonymen qatar, bólinis basshylyǵy tarapynan oryn alǵan ádepsiz áreketterge baılanysty qyzmettik tekserý bastaldy. Tekserý nátıjesi boıynsha tıisti baǵa beriletin bolady,-dep málimdedi oblystyq PD baspasóz qyzmeti.
Buǵan deıin Atyraý oblysy Maqat aýdanynda polıtsııa qyzmetkerlerin urǵandarǵa qatysty qylmystyq is qozǵalǵanyn jazǵan edik.
