Atyraýda apatty munaı uńǵymasy mańynan qustardyń óleksesi tabyldy
ATYRAÝ. KAZINFORM — Mahambet aýdanyndaǵy Tańdaı aýyly mańynda ornalasqan apatty munaı uńǵymasy janyndaǵy shuńqyrdan 10-nan jabaıy úırektiń óleksesi tabyldy. Bul derekti oblys ákiminiń baspasóz hatshysy Rýslan Jumaǵazıev rastady.
Eski uńǵyma Tańdaı aýylynan shamamen 3 shaqyrym jerde, Tańdaı — Aqqystaý avtojolynyń boıynda ornalasqan. Aýdan ákimdiginiń málimetinshe, 1960 jyldardyń basynda atalǵan aýmaqta «Embimunaıgaz» birlestigi tarapynan munaı uńǵymasyn burǵylaý jumysy júrgizilgen.
— Burǵylaý jumysy barysynda uńǵyma túsip ketken, nátıjesinde osy kúnge deıin shuńqyr paıda bolǵan. 2024 jyly adamdar men janýarlardyń ómiri men qaýipsizdigine tónetin qaýipti azaıtý maqsatynda «Tumar Petrol» mekemesiniń demeýshiligimen shuńqyrdyń aınalasy betonmen qorshaldy. Sonymen qatar shuńqyrdy mekendegen ishindegi jabaıy qustar alynyp, ishi tazartyldy, — dep habarlady Mahambet aýdandyq ákimdiginiń baspasóz qyzmeti.
Aýdan ákimdiginiń málimetinshe, qazir atalǵan nysannyń ornalasqan jer ýchaskesi eshkimniń menshigine tıesili emes.
Aldyn ala málimet boınysha, K-30J dep belgilengen uńǵyma 1965 jyly burǵylanǵan. Keıin ol Atyraý oblysyndaǵy ekologııalyq problemalar tizilimine engizilgen. Ekologııa departamenti bergen aqparatqa súıensek, «TUMAR I-Energy» (burynǵy «TUMAR PETROL») 2022 jylǵy 8 qarashada № 5127-ÝVS kelisimsharty boıynsha Jaıyq ýchaskesinde kómirsýtekterdi barlaý jáne óndirý quqyǵyn alǵan.
— Qazir kompanııa uńǵymany joıý máselesin zerttep jatyr. 2026 jylǵy 26 shildede Energetıka mınıstrligine shuńqyrdaǵy suıyqtyqty baqylaýmen soryp alý jáne onyń quramyn anyqtaý jónindegi ınjenerlik-izdestirý jumysyn júrgizý týraly usynys joldaǵan. Aldyn ala baqylaý merzimi alty aıǵa deıin sozylýy múmkin, — delingen habarlamada.
Buǵan deıin Jylyoı karbonatty platformasy aýmaǵynda jańa munaı-gaz qorlaryn izdeý jumystary jalǵasyp jatqany jóninde jazǵan edik.
