Atyraýda apatty dep tanylǵanyna 15 jyl bolǵan úıde adamdar áli turyp jatyr

ATYRAÝ.KAZINFORM – Qazirgi ýaqytta Atyraý oblysynda apatty úı sany 190-nan asady. Onyń 90-ǵa jýyǵy Atyraý qalasynda ornalasqan. Turǵyndar salynǵanyna 1 ǵasyr jýyqtaǵan baspanalar adam ómirine qaýipti dep, dabyl qaǵyp jatyr.

Qabyrǵasy sógilip, tóbesi qulap turǵan úıler qaladaǵy Shúkir Erkinov kóshesinde de bar. Syrtqy kórinisi adam shoshyrlyqtaı keıipke túsken №4 jáne №4a úı 70 jyl buryn salynǵan. Osyǵan deıin ákimdik jańa baspana kiltin tabystaımyz dep birneshe ret ýáde etkenmen, ázirge naqty nátıje joq kórinedi.

- Osyǵan deıin bizdi mektepke jınap, «Ogorodnyı» shaǵyn aýdanynda salynyp jatqan kópqatarly úıge kóshiremiz dep qala ákimi Shákir Keıkın ýádesin bergen edi. Al bıyl áńgime ózgerdi. Búginde biz turyp jatqan baspana eshkimniń balansynda emes. Páter ıeleri kooperatıvi de joq, - dedi turǵyn Farıza Sársenǵalıeva.

Turǵyndar jyl saıyn páter ishin jóndep, kútip ustaýǵa tyrysqanmen, qabyrǵalar kóktep, turýǵa múmkindik bolmaı otyr .

- Úıimiz jyly ári taza bolsa eskiligine qaramaı tura beretin edik. Alaıda jylý joq. Jylýdyń qysymy páterlerge jetpeıdi. Úıde syrt kıimmen júrýge májbúrmiz. Jan baǵýdyń jolyn izdegen kórshilerimiz páter jaldap ketip jatyr. Al qarjysy joqtarǵa amalsyzdan osy úıde turý týra keledi. Úıdegi jıhazdar kóktep ketti. Halyq mıllıondap nesıe alyp, jóndeý jasaıdy. Alaıda ózgeris joq, - dedi turǵyn Aızada Beısembaı.

Atyraý qalalyq TÚKSh jáne turǵyn ınspektsııasy bólimi ókilderiniń sózinshe, Shúkir Erkinov kóshesinde apatty 3 úı bar. Bir úıde 22 páter. Bul baspanalar 2011 jyly apatty dep tirkelgen.

- Atyraý oblysy ákiminiń orynbasarymen bekitiligen jol kartasy bar. Ol 2029 jylǵa deıin qamtylǵan. Jyl basynda apatty dep tanylǵan 2 úıdi súrý týraly sheshim qabyldadyq. Qalǵan 89 úıdi 2029 jylǵa deıin kóshiremiz. Bıýdjetten qarjy bólinip, páter alynýyna baılanysty apatty turǵyn úıde turyp jatqandarǵa baspana beriledi, - dedi Atyraý qalalyq turǵyn úı-kommýnaldyq sharýashylyq jáne turǵyn úı ınspektsııasy bólimi sektorynyń meńgerýshisi Gúljamal Joldasova.

Bólim qyzmetkerleriniń aıtýynsha, jylyna ortasha eseppen 7-8 apatty úı kóshiriledi. Aldaǵy 3 jylda ákimdik apatty úılerdiń ıelerin jańa pátermen qýantý úshin kem degende jylyna 29 úıdi kóshirý kerek.

Aıta keteıik, Atyraý oblysynda 2023 jyly 13, 2024 jyly 24, 2025 jyly 20 úı kóshirilgen.

Osyǵan deıin zeınetaqy jınaǵy esebinen turǵyn úı alýdyń tártibi ózgergeni jóninde jazdyq.