Atyraýda apatty dep tanylǵan eki mekteptiń qurylysy qashan aıaqtalady

ATYRAÝ. KAZINFORM – Atyraý qalasynda birneshe jyldan beri ustazdar men ata-analardy alańdatqan eki bilim ordasynyń qurylysy júrip jatyr. 1500 oryndyq úsh tilde bilim beretin mekteptiń irgetasy quıylyp, qabyrǵalary kóterilip jatsa, apatty jaǵdaıda turyp, keıin buzylǵan Mıhaıl Lomonosov atyndaǵy bilim oshaǵyna jańa ǵımarat salý úshin jer daıyndalyp jatyr.

mektep
Foto: vıdeodan alynǵan skrın

Úsh tilde oqytatyn daryndy balalarǵa arnalǵan №30 mektep-gımnazııa 2002 jyly paıdalanýǵa berilgen. 2021 jyly shatyrdan sý ketip, ujym men oqýshylardy, ata-analardy ábigerge salǵan. 2022 jyly mektep jabylyp, qalanyń birneshe bilim oshaǵynda oqý protsesin uıymdastyrý týraly sheshim qabyldanǵan. 2023 jylǵy jeltoqsanda «ZIGMUND» JShS ǵımarattyń tehnıkalyq jaǵdaıyna baǵalaý júrgizilip, nysandy apat aldyndaǵy jaǵdaıda dep tanydy. Keıin Atyraý oblysynyń Qurylys, sáýlet jáne qala qurylysy basqarmasynyń tapsyrysy boıynsha «TALAP Engineering» JShS qaıtalama tehnıkalyq zertteý júrgizgen. Zertteý qorytyndysyna sáıkes ǵımarattyń fızıkalyq tozýy kórsetkishi — 71,0%, moraldyq tozýy — 83,6%. Nysandy qalpyna keltirý nemese qaıta jańartý tıimsiz dep tanylǵan. Keıin jaýaptylar jańa mektep salý kerektigi týraly sheshim qabyldaǵan edi.

Bıyl jazǵa qaraı apatty ǵımaratty buzý bastalyp, búginde jańa nysannyń irgetasy quıylyp, qabyrǵalaryn kóterip jatyr. Jumys jobalaýdan bastap «kilt tapsyrýǵa» deıingi tolyq tsıkldi qamtıtyn EPC-kelisimshart boıynsha júzege asyp jatyr. Qazir qurylys alańynda 80-ge tarta jumysshy men 20 tehnıka jumys istep júr. Jumys aýqymynyń keńeıýine qaraı olardyń sanyn 200-ge deıin kóbeıtý josparlanyp otyr. Atyraý oblysy ákimdiginiń aqparatyna súıensek, ǵımarat qurylysymen birge syrtqy ınjenerlik jelilerdi tartý jáne aýmaqty abattandyrý jumysy da júrip jatyr. Osy aptada sý jelilerin tartý aıaqtalady, al kelesi aptada káriz, jylý jáne gaz jelilerin júrgizýge kirispek.

Bilim nysany «Keleshek mektepter» standartyna saı salynyp jatyr. Oqý kabınetterimen qatar STEM-zerthana, robot tehnıkasy jáne horeografııa kabınetteri, lıngafondy-kompıýterlik kabınet, akt jáne sport zaldary qarastyrylǵan. Oqýshylarǵa arnap ashana, demalys aımaqtary men kovorkıng keńistikter de jabdyqtalady. Qaýipsizdikti beınebaqylaý júıesi qamtamasyz etedi.

Mektep jańa oqý jyly bastalǵan boıda shákirt qabyldaýy úshin qurylysty 2027 jylǵy shildede aıaqtaý josparlanǵan. Joba quny 12 mlrd teńgeden asady. Aımaq basshysy nysandy paıdalanýǵa berýge qatysty tehnıkalyq máselelerdi aldyn ala kelisýdi tapsyrǵan. Naqtyraq aıtqanda, Tótenshe jaǵdaılar departamentimen birlese jumys isteý jáne órt qaýipsizdigi talaptaryn ýaqytynda oryndaý qajet ekenine erekshe nazar aýdardy. Avtoturaq máselesi de ózekti. Óıtkeni, mekteptiń qasynda iri kompanııanyń ǵımaraty men kópir ornalasqan.

Atyraý qalasyndaǵy M.Lomonosov atyndaǵy mekteptiń oqýshylary 2 jyldan beri eki ǵımaratta oqyp júr. Osy jyldyń sáýirinde oqýshylar men ustazdar sapaly bilim protsesin uıymdastyrýdy talap etip, áleýmettik jeli arqyly bılik ókilderinen máseleni tezirek sheshýdi suraǵan edi. Óıtkeni bul joba týraly jıi aıtylǵanmen, qurylystyń bastalýyn halyq taǵatsyzdana kútti.

Oblys ákimi Bolat Aqsholaqovtyń aıtýynsha, jeke turǵyn úıge qatysty jaǵdaıǵa jáne oryn sanynyń 900-ge deıin kóbeıýine baılanysty jobany qaıta qaraýǵa, ǵımarat ornalasatyn oryndy ózgertýge jáne onyń syıymdylyǵy men oqý protsesine qajetti jaǵdaılardy saqtaýǵa múmkindik beretin sheshim izdeýge týra keldi. Endi qaıta saraptamadan ótkizý qajet. Jalpy joba quny – 7,9 mlrd teńge.

- Men turǵyndarǵa balalar 1 qyrkúıekte jańa mektepke keledi dep sóz berdim. Bergen ýádeden bas tartpaımyz. Ketken ýaqyttyń ornyn toltyryp, qajet bolsa, brıgadalardy kúsheıtýdi jáne jumys sapasyn baqylaýdy qamtamasyz etýimiz kerek, - dedi Bolat Aqsholaqov.

Búginde jobalaý jáne jer jumysy júrip jatyr: jobalyq-smetalyq qujattama 70, jer jumysy 40, nysannyń irgetasyn qalaý úshin jer qazý jumystary 70%-ǵa oryndalǵan.

Merdiger uıymnyń málimetinshe, topyraq zerttelip, zerthana oń qorytyndy bergen. Ǵımarattyń irgetasyn nyǵaıtý maqsatynda tıisti ınjenerlik sheshimder men sý burý júıesi qarastyrylǵan.

Aýdany 10 myń sharshy metrden asyp jyǵylatyn úsh qabatty ǵımaratta oqý kabınetteri, zerthanalar, kitaphana, 216 oryndyq akt zaly, ashana, sheberhanalar jáne eki sport zaly bolady. Budan bólek, fýtbol, ámbebap sport alańdary, vorkaýt-aımaq jáne avtoturaq bolady.

Eki bilim ordasynyń qurylysy 2027 jyldyń qyrkúıegine deıin aıaqtalyp, jańa oqý jylynda ashylýy tıis.

Buǵan deıin úsh jyldan astam ýaqyt boıy bos turyp, tozǵan Atyraý oblystyq polıtsııa departamentiniń burynǵy ǵımaraty qaıta jańǵyrtylyp jatqanyn jazǵan edik.